බර අඩුකරගන්න මහන්සිවෙන අයට වටිනා උපදෙස් ටිකක්

අද අපි කතාකරන්න බලාපොරොත්තු වෙන්නේ බොහෝ දෙනෙක්ට වැදගත් වෙන මාතෘකාවක් ගැන. සාමාන්‍යයෙන් ලෝකයේ ජනතාව අතරින් අති විශාල පිරිසක් දෛනිකව උත්සහ කරනවා තමන්ගේ ශරීරයේ බර අඩුකරගන්න. අඩුම තරමේ BMI හෙවත් ශරීර ස්කන්ධ දර්ශකය අනුව වත් උසට හරියන බර පවත්වාගෙන යන්න.

මොකද අපි හැමෝම දන්නවා ශරීරයේ අධික බර නිසා ඇතිවෙන රෝගී තත්වයන් ගැන. අධි රුධිර පීඩනය, කොලෙස්ටරෝල් අධිප්‍රමාණය, හෘදරෝග, අස්ථි සම්බන්ධ රෝග වැනි බොහොමයක් බරපතල රෝගී තත්වයන්ට පවා අධික බර හේතු වෙනවා. ඉතින් මේ කියන්න යන තොරතුරු ටික බර අඩුකරගන්න උත්සහ කරන කෙනෙක්ට සෑහෙන්න වැදගත් වෙනවා.

මුලින්ම අපි බැලුවොත් ඇයි අපේ ශරීරයේ බර ප්‍රමාණය ඉක්මවා යන්නේ කියලා ඒකට හේතු දෙකක් තියනවා. එකක් තමයි අපේ සංජානමය කරුණු හෙවත් අපේ දෙමව්පියන් සාමාන්‍යයෙන් අධික ශරීර ස්කන්ධය සහිත පුද්ගලයන් නම් දරුවන්ටත් ඒ තත්වයන් ඇතිවෙන්න බොහෝදුරට ඉඩකඩ තියනවා. අනිත් හේතුව තමයි අපේ දෛනික පුරුදු. ඒ කියන්නේ ආහාර රටාව, රැකියා සිදුකරන ආකාරය, ව්‍යායාම, නින්ද සහ ක්‍රියාකාරිත්වය අනුව අපේ ශරීරයේ බර වෙනස් වෙනවා. උදාහරණයක් විදිහට අධික තෙල් සහ පිෂ්ටය සහිත ආහාර ගැනීම, ව්‍යායම අඩුවෙන් සිදුකිරීම, එකතැන සිට කරන වෘත්තිය වගේ දේවල් නිසා අපේ ශරීරයේ බර නොදැනුවත්වම වාගේ අවශ්‍ය ප්‍රමාණය ඉක්මවා යනවා.

ඉතින් සමහරු බර ඉක්මණින් අඩුකරගන්න කියලා විවිධ අවදානම් වෛද්‍ය ක්‍රම වලට පවා පෙළඹෙනවා, තවත් උදවිය ඉතාම අසීරු ව්‍යායාම ක්‍රම සිදුකරනවා. ඒත් ඒවායෙන් බොහෝදුරට බර අඩුවෙන්නේ තාවකාලිකවයි. දිගු කාලයක් තිස්සේ බර නිසි පිරිදි පවත්වාගෙන යන්නනම් මෙන්න මේ දේවල් කරලා බලන්න. මේ හැම දෙයක්ම පහසුවෙන් එදිනෙදා කරන්න පුළුවන් දේවල්.

සතියකට වරක්වත් බර මනින්න

බර මනින නිවැරදි තරාදියක් මිලට අරගෙන නැත්නම් එහෙම තරාදියක් තියන තැනකට ගිහින් සතියක නිශ්චිත දිනයක බර මනින්න. මැනලා පුළුවන් නම් සටහන් කරගන්න. එතකොට ඔබටම බලාගන්න පුළුවන් ඔබගේ බර වෙනස්වීම සහ මොන මොන දේවල් නිසාද බර වෙනස්වෙන්නේ කියන එක.

පියවර 5000 ක්

මේකට ස්මාර්ට් දුරකතන app එහෙමත් තියනවා, නැත්නම් අඩුමිලට ගන්න පුළුවන් ස්මාර්ට් ඔරලෝසුවක් අතේ බැඳගෙන වුනත් මේක කරන්න පුළුවන්. මොකුත්ම නැත්නම් හිතින් ගණන් කරන්නත් පුළුවන්. එහෙම කරලා දවසට අවම පියවර 5000ක් වත් ඇවිදින්න. සාමාන්‍යයෙන් එක දිගට සාමාන්‍ය වේගයෙන් ඇවිදගෙන ගියොත් ආසන්න වශයෙන් කිලෝමීටර් 4 ක විතර දුරක් ඇවිදිද්දි පියවර 5000 සම්පූර්ණ කරන්න පුළුවන්. නිරෝගී පුද්ගලයෙක්ට කිලෝමීර් 4ක් ඇවිදින්න විනාඩි 30 සිට පැයක් දක්වා කාලයක් ඇතුලත පුළුවන්. ඉතින් දවසට පැයක් ඇවිදින්න පුළුවන්නම් බලාගෙන හිටිද්දි ඔබේ බර අඩුවෙනවා සහ ශරීරය ශක්තිමත්වෙලා නිරෝගී වෙනවා.

ඒ වගේම ඔබට එහෙම දවසේ වෙලාවක් වෙන්කරගෙන ඇවිදින්න අමාරුනම් ගෙදර ඉඳන් බස් නැවතුවට ඇති දුර ඇවිදගෙන යන්න. කාර්යාලයට ටිකක් මෙහායින් බස් එකෙන් බැහැලා ඇවිදගෙන යන්න. වෙනදා කඩේ ලඟට ගියේ බයික් එකක හරි වාහනේ හරි නම් පයින් යන්න උත්සහ කරන්න. එතකොට ලොකු ආයාසයකින් තොරවම මේ පියවර 5000 දිනපතා සම්පූර්ණ වෙයි.

බත් කෑම අඩු කරන්න

සාමාන්‍යයෙන් ලංකාවේ අපිටනම් බත් නැතුව ජීවත්වෙන්න ටිකක් අමාරුයි. ඒත් තුන්වේලටම බත් හරි වෙනත් පිෂ්ඨය සහිත ආහාර ගන්නවනම් ඉතින් බර අඩුකරගන්න එක ගැන අදහස හිතින් අතාරිමු. බර අඩුකරගන්න අවශ්‍ය නම් රාත්‍රී ආහාර වේලට බත් වෙනුවට එළවළු හෝ පළතුරු වලට මාරු වෙන්න. තව උදේ සහ දවල් බත් කනකොට වුනත් විශාල බත් ප්‍රමාණයක් කන්නේ නැතිව බත් ප්‍රමාණය අඩුකරලා එළවළු සහ කොළ වර්ග ප්‍රමාණය වැඩිකරගන්න. ඒක බර අඩුකරන්න වගේම ශරීරයේ වෙනත් ආබාධ වලට පවා හොඳ ප්‍රතිකර්මයක් වේවි.

විනාඩි 30 ක ව්‍යායාමයක්

ඔබ දෛනිකව නිවසේ හරි වෙනත් රාජකාරියකට හරි ශරීරය හොඳින් වෙහෙසවන කෙනෙක් නෙවෙයි නම් අඩුම දවසකට විනාඩි තිහක් වත් ඔබේ බෙල්ලට, අත් දෙකට, උරහිස්වලට, බඩ සහ ඉණ ප්‍රදේශ වලට, කලවා සහ පාද වලට හොඳට දැනෙන්න ව්‍යායාම කරන්න. විනාඩි තිහක් විතර පාපැදියක් පදින්න පුළුවන්නම් ඒකත් හොඳ ව්‍යායාමයක්. ඒත් බෙල්ලට සහ අත්වලට වගේම ඉණට හොඳ ව්‍යායාමයක් ලැබෙන පරිදි ඒ විනාඩි 30 ගතකරන්න පුළුවන්නම් වඩාත් හොඳයි. මොකද ශරීරයේ වැඩිපුර මේදය එකතුවෙලා ශරීරයේ බර වැඩිකරන්න හේතුවෙන තැන් තමයි බෙල්ල, උරහිස්, අත්ගොබ, බඩ, ඉණ, තට්ටම්, කලවා සහ පාද වගේ කොටස්. මේවා හොඳින් ක්‍රියාත්මක වෙද්දි ඒවායේ මේදය තැන්පත්වීම වැලැක්වෙන නිසා බර වැඩිවීම පාලනය වෙනවා.

පුංචි පුංචි ඉලක්ක

ඔබේ මේ දේවල් කරන අතරේ මාසිකව පුංචි ඉලක්කයක් හදාගන්න. හිතන්න දැන් ඔබේ බර කිලෝ 100ක් කියලා. ඔබට අවශ්‍යයි අවුරුද්දකින් ඔබේ බර කිලෝ 80ට අඩුකරගන්න. ඔබට හිතෙයි අම්මෝ ඒක නම් කරන්න බෑ කියලා. සෘණාත්මක නොවී ධනාත්මකව බැලුවොත් මේ ඉලක්කය අපිට ලඟාවෙන්න හැකි විදිහට බෙදාගන්න. අවුරුද්දකින් කිලෝ 20ක් අඩුකරගන්න අවශ්‍ය නම් සාමාන්‍යයෙන් මාසයකට කිලෝ 1.5-2 අතරේ ප්‍රමාණයක් තමයි ඔබට අඩුකරන්න වෙන්නේ. ඉතින් මාසයක් හරියට මේ දේවල් කරොත් මේ ඉලක්කය ඒ තරම් අමාරු එකක් නෙවෙයි. අනිත් එක එක මාසයකදි මේ ඉලක්කයට යන්න බැරිවුනොත් ඊළඟ මාසයේ මේ දේවල් චුට්ටක් වැඩි කරන්න උදාහරණයක් විදිහට පියවර 5000 වෙනුවට පියවර 7500ක් සහ ව්‍යායාම මිනිත්තු 30 වෙනුවට පැයක්. එතකොට ඉලක්කය එච්චර අමාරු නෑ.

අතහරින්න එපා!

ගොඩක් දෙනෙක් කරන වැරැද්දක් තමයි ටික දවසක් ට්‍රයි කරලා හරියන්නේ නෑ කියලා අතෑරලා දාන එක. මෙහෙම හිතන්නකෝ බිල්ඩින් එකක් හදන්න අවුරුදු ගාණක් යනවා, ඒත් ඒක දවසෙන් දෙකෙන් කඩලා දාන්න පුළුවන් වුනාට අවුරුදු ගාණක් තිස්සේ ඔබ වියදම් කරගෙන මහන්සි එහෙම වෙලා වැඩිකරගත්ත බර අඩුකරන්න ටික කාලයක් යනවා. කවුරු මොනවා කිව්වත්, ඔබ අතාරින්නේ නැතිව මේ දේවල් දිගට කරගෙන යනවනම් බර අඩුකරගන්න එච්චර අමාරු දෙයක් නෙවෙයි.

- ඔබගේ මිතුරන්ටත් බලන්න Share කරන්න..