අතුරුගිරිය ප්‍රදේශයේ දී ඝාතනයට ලක්වූ සුරේන්ද්‍ර වසන්ත පෙරේරා මහතාගේ දේහයේ
නිරුවත් ඡායාරූප සමාජ මාධ්‍යට මුදාහැරීම සම්බන්ධයෙන් හෝමාගම මූලික රෝහලේ
පුද්ගලයින් 30 දෙනෙකුගෙන් පමණ සාක්ෂි සටහන්කරගෙන ඇති බව පොලිසිය අධිකරණය හමුවේ ඊයේ (05) අනාවරණය කළා.
ඒ කඩුවෙල මහේස්ත්‍රාත් චාණිමා විජේබන්ඩාර මහත්මිය ඉදිරියේ මෙතෙක් විමර්ශනවල ප්‍රගතිය අධිකරණය හමුවේ අනාවරණය කරමිනි.
පශ්චාත් මරණ පරීක්ෂණය සඳහා එක්වූ වෛද්‍ය සිසුන් හරහා එම ඡායාරූප සමාජ මාධ්‍ය වෙත මුදාහැර ඇති බවට අනාවරණය වූ බවයි එහි දී පොලිසිය සඳහන් කළේ.
අදාළ ඝාතනය සිද්ධියට සම්බන්ධ වීඩියෝ දර්ශන මාධ්‍ය ආයතනවලට ලැබීම සම්බන්ධව එම මාධ්‍ය ආයතනවලින් ප්‍රකාශ සටහන් කර ගත්තේ ද යන්න මෙහිදී මහේස්ත්‍රාත්වරිය පොලිසියෙන් විමසීමක් කළා.
එහිදී පොලිසිය අධිකරණය වෙත දන්වා සිටියේ අදාළ සිද්ධිය සම්බන්ධයෙන් වාර්තාකරණයේ යෙදුණු ප්‍රාදේශීය මාධ්‍යවේදීන්ගෙන් ඒ පිළිබඳව කරුණු සටහන් කරගත් බවයි.
අදාළ මාධ්‍ය ආයතන හිමිකරුවන්ගෙන් ප්‍රකාශයක් සටහන්කරගන්නා ලෙසත් මෙම නීති කෘත්‍ය සම්බන්ධයෙන් නීතිපතිවරයාට ලිඛිතව දන්වන ලෙසද මහේස්ත්‍රාත්වරිය එහි දී නියෝග කර සිටියා.
මෙහිදී විමර්ශන කටයුතු සිදු කරනු ලබන නිලධාරීන් විසින් අදාළ සිද්ධිය සම්බන්ධයෙන් ලබාගත් ඩී.එන්.ඒ. සාම්පල කිහිපයක් පිළිබඳව අධිකරණය වෙත කරුණු දක්වන ලද අතර එම සිද්ධිය සම්බන්ධයෙන් අනෙක් සැකකරුවන් අත්අඩංගුවට ගැනීම සඳහා අවශ්‍ය මූලික සැලසුම් සකස් කර ඇති බවත් අධිකරණය හමුවේ සඳහන් කළා.
මෙම සිද්ධියේ විමර්ශන කටයුතු ඉක්මනින් අවසන් කිරීමට කටයුතු කරන ලෙසද අධිකරණය පොලිසියට නියෝග කර තිබෙනවා.
සිද්ධිය සම්බන්ධයෙන් අත් අඩංගුවේ සිටින එම ටැටූ මධ්‍යස්ථානයේ හිමිකරු ඇතුළු සැකකරුවන් 10 දෙනා අගෝස්තු මස 20දා දක්වා තවදුරටත් රක්ෂිත බන්ධනාගාරගත කරන ලෙස කඩුවෙල මහේස්ත්‍රාත්වරිය නියෝග ලබා දුන්නා.
