ඉන්දියාවට එරෙහිව පැවති තුන්වැනි එක්දින තරගයෙන් ලකුණු 110 ක විශිෂ්ඨ ජයක් වාර්තා කිරීමට ශ්‍රී ලංකා පිළ සමත් වුණා.
ඉදිරිපෙළ පිතිකරුවන් ලබාගත් ආරම්භයෙන් විශිෂ්ඨ ප්‍රයෝජන ගත් දුනිත් වෙල්ලාලගේ (27/5) ප්‍රමුඛ ශ්‍රී ලංකා දඟ පන්දු යවන්නන්ගේ දක්ෂතා හමුවේ දෙපිල අතර එක්දින තරගාවලිය 2-0ක් ලෙස ජයගැනීමට ශ්‍රී ලංකා ක්‍රීඩකයන්ට හැකියාව ලැබුණා.
ශ්‍රී ලංකා පිල ඉන්දීය පිල හමුවේ වසර 27ක එක්දින තරගාවලි පරාජයන් රැල්ලට තිත තැබීමට ද ඒ අනුව හැකියාව උදා වුණා.
ශ්‍රී ලංකා පිල අවසන් වරට 1997 වසරේ අර්ජුන රණතුංගගේ නායකත්වයෙන් ඉන්දියාවට එරෙහිව එක්දින තරගාවලියක් 3-0ක් ලෙස ජයගෙන තිබූ අතර, අනතුරුව දෙරට අතර පැවති ද්වීපාර්ශ්වික එක්දින තරගාවලි 11ම ජයගෙන තිබුණේ ඉන්දියාවයි.
චරිත් අසංලක ශ්‍රී ලංකා එක්දින කණ්ඩායම මෙහෙයවූ පළමු අවස්ථාව මෙය වන අතර, මේ කණ්ඩායමේ පුහුණුකරු ලෙස කටයුතු කරන සනත් ජයසූරිය ශ්‍රී ලංකා පිල අවසන් වරට (1997) එක්දින තරගාවලියක් ජය ගනිද්දී එම කණ්ඩායමේ ආරම්භක පිතිකරු ලෙස කටයුතු කරනු ලැබූ ක්‍රීඩකයෙක් වීම නිසා නායක චරිත්ට මෙන්ම පුහුණුකරු සනත්ට ද මෙම තරගය සුවිශේෂී වුණා.
තරගයේ පළමුව පන්දුවට පහර දෙමින් ශ්‍රී ලංකා පිල දුන් ලකුණු 249ක ඉලක්කය හමුවේ ඉන්දීය පිලට ඕවර 26.1කදී සියල්ලන් දැවී රැස් කළ හැකි වූයේ ලකුණු 138ක් පමණි.
ඉන්දීය පිළිතුරු ඉනිම ලකුණු 37ක් වෙද්දී පළමු කඩුල්ල බිඳ වැටුණු අතර, වේගවත් ආරම්භයක් දීමට උත්සාහ කළ නායක රෝහිත් ශර්මා පන්දු 20කින් ලකුණු 35ක් රැස් කර සිටියදී දුනිත් වෙල්ලාලගේගේ පළමු ගොදුර බවට පත් වෙමින් දැවී ගියා.
පළමු කඩුල්ලට ලකුණු 37ක් එක්වීමෙන් අනතුරුව 9 වැනි කඩුල්ලට ද ලකුණු 37ක් එක් කිරීමට වොෂිංටන් සුන්දර් සහ කුල්දීප් යාදව් සමත් වූ අතර, සෙසු පිතිකරුවන්ට සාර්ථක වීමට ශ්‍රී ලංකා පන්දු යවන්නන්ගෙන් අවස්ථාවක් නොලැබිණි.
සුන්දර් ලකුණු 30ක්, විරාට් කෝලි ලකුණු 20ක් සහ රියාන් පරාග් ලකුණු 15ක් රැස් කළ අතර, සෙසු පිතිකරුවන්ට ලකුණු 10 සීමාව ඉක්මවීමට අවස්ථාවක් ලැබුණේ නැහැ.
ඊයේ සිය එක්දින තරග දිවියේ හොඳම පන්දු යැවීම සටහන් කළ දුනිත් වෙල්ලාලගේ ලකුණු 27කට කඩුලු 5ක් බිඳ දැමූ අතර, ජෙෆ්රි වැන්ඩර්සේ සහ මහීෂ් තීක්ෂණ කඩුලු 2 බැගින් දවා ගත්තා.
ශ්‍රී ලංකා ඉනිම ලකුණු 250 අබියසට ගෙනයෑමට හැකි වුණේ මුල් පෙළ පිතිකරුවන් තිදෙනාගේ සාර්ථකත්වයෙන්.
පළමු කඩුල්ලට අවිශ්ක ප්‍රනාන්දු සහ පැතුම් නිශ්ශංක ලකුණු 89ක සබඳතාවක් ගොඩනැඟුණු අතර, නිශ්ශංක පළමු කඩුල්ල ලෙස දැවී ගියේ පන්දු 65කදී හතරේ පහර 5ක් සහ හයේ පහර 2ක් සමඟ ලකුණු 45ක් රැස්කර සිටියදීය.
ඉන්පසු අවිශ්ක දෙවැනි කඩුල්ලට කුසල් මෙන්ඩිස් සමඟ ලකුණු 82ක එක් කළ අතර, ඔහු දැවී යන විට මුළු ලකුණු සංඛ්‍යාව 171ක්.
ජාත්‍යන්තර තරග වරම් හිමිකර ගත් රියාන් පරාග් හමුවේ අවිශ්ක අවාසනාවන්ත ලෙස දැවී යන විට ශතකයට ලකුණු 4ක් පසුපසින් සිටියා.
පන්දු 102කදී හතරේ පහර 9කින් සහ හයේ පහර 2 ක් ඔහුගේ වර්ණවත් ඉණිමට ඇතුළත් වුණා.
අවිශ්කගේ දැවීයෑමත් සමඟ පිතිකරුවන් 5 දෙනකු ලකුණු 28ක් තුළ දැවී යෑමෙන් ශ්‍රී ලංකාවට විශාල ලකුණු පුවරුවක් කරා යෑමට තිබූ අවස්ථාව අහිමිව ගිය ද එක් අන්තයක් රැකගත් කුසල් මෙන්ඩිස් පන්දු 82කදී හතරේ පහර 4ක් සමඟ ලකුණු 59ක් රැස් කළ අතර, කමිඳු පන්දු 19කින් ලකුණු 23ක් රැස් කරමින් නොදැවී කඩුල්ලේ රැඳී සිටිමින් අගනා ඉනිමක් ක්‍රීඩා කළා.
අවසන් තරගයේ වීරයා ලෙස අවිශ්ක ප්‍රනාන්දු සම්මාන දිනාගත් අතර, තරගාවලියේ වීරයා සම්මානය දුනිත් වෙල්ලාලගේට හිමි වුණා.
