හරීන් ප්‍රනාන්දු සහ මනූෂ නානායක්කාර සමගි ජන බලවේගයෙන් නෙරපා හැරීමේ තීරණය නීත්‍යානුකූල බවට ශ්‍රේෂ්ඨාධිකරණ තීන්දුවෙන් මොහොතකට පසු, ජනාධිපති රනිල් වික්‍රමසිංහ මහතා ඊයේ (09) පෙරවරුවේ හරීන් සහ මනූෂ හමුවී ඔවුන් දෙදෙනාගේ සහයෝගයට ස්තූතිය පළ කර තිබෙනවා.
ජනාධිපතිවරයා තමාට සහ මනූෂට ‘දුක් වෙන්න එපා’ යයි පැවසූ බව හරීන් ප්‍රනාන්දු සඳහන් කර තිබෙනවා.
හරීන් සහ මනුෂගේ අමාත්‍ය ධුර අහිමි වීම සම්බන්ධයෙන් ජනාධිපතිවරයා දැඩි කෝපයට පත් ව සිටින අතර, දෙදෙනාගේ දැඩි කැපවීම අගය කරමින් තමන් සමඟ රැඳී සිටින ලෙස ඔවුන්ගෙන් ඉල්ලා ඇති බවයි වාර්තා වන්නේ.
ජනාධිපතිවරයාගේ මැතිවරණ ව්‍යාපාරයට සම්බන්ධ වන බවට ඔවුන් ප්‍රතිඥා දී ඇති බව ද සඳහන්.
“ජනාධිපතිතුමා මට එතුමාගේ රැලි 100 මෙහෙයවීමේ කාර්යය භාර දීලා තියෙනවා. ඒ නිසා මම ඒකට සම්පූර්ණයෙන්ම සම්බන්ධ වෙනවා. එතුමා දිනුවොත් මම ආසනයකට තරග කරනවද කියලා මම පසුව තීරණය කරනවා” යැයි හරීන් ප්‍රනාන්දු මාධ්‍ය වෙත පවසා සිටියා.
මනූෂ ද ජනාධිපතිවරයාගේ ප්‍රචාරක ව්‍යාපාරයට ද සම්බන්ධ වීමට නියමිතයි.
හරීන් සහ මනූෂ පාර්ලිමේන්තු මන්ත්‍රී ධුරවලින් නෙරපා හැරීමෙන් පසු සංචාරක, තරුණ හා ක්‍රීඩා අමාත්‍යාංශ ජනාධිපතිවරයා යටතට පත්වන අතර ඉඩම් සහ විදේශ රැකියා අමාත්‍යාංශය අයත්වන්නේ අග්‍රාමාත්‍ය දිනේෂ් ගුණවර්ධන මහතාගේ විෂය පථයටයි.
කෙසේ වෙතත් සංචාරක ව්‍යාපාරයේ උච්චතම අවස්ථාව හේතුවෙන් සංචාරක රාජ්‍ය අමාත්‍යවරයෙකු දිවුරුම් දීමට නියමිත බව ද වාර්තා වෙනවා.
