ජාත්‍යන්තර මුල්‍ය අරමුදල, ලෝක බැංකුව සහ ආසියානු සංවර්ධන බැංකුව පමණක් නොව මේ රටේ ජනතාවගේ අවශ්‍යතා වෙනුවෙන් ද රජය බැඳී සිටින බව ශ්‍රී ලංකා පොදුජන පෙරමුණේ ජනාධිපති අපේක්ෂක නාමල් රාජපක්ෂ මහතා පවසනවා.
ජාත්‍යන්තර මූල්‍ය අරමුදල, ලෝක බැංකුව සහ ආසියානු සංවර්ධන බැංකුව තෘප්තිමත් කරනවාට වඩා ජනතාව රැකබලා ගැනීමට රජය බැඳී සිටිනවා යැයි රාජපක්ෂ මහතා පැවසුවේ යක්කල පැවති ජන හමුවකදීය.
“අපි මේ ජාතියට ආදරය කරන කණ්ඩායමක්. අපි අඩු වරප්‍රසාදලත් අයට සම්බන්ධයි. අපි අපේ සංස්කෘතියට පන්සලට බැඳිලා ඉන්නවා. මේ රටේ ජනගහණය ආරක්‍ෂා කිරීමේ අපේ වගකීම අපි තේරුම් ගෙන තිබෙනවා.
රටේ අධ්‍යාපන ක්‍රමය නවීකරණය කළ යුතු බව අපි විශ්වාස කරනවා. දරුවන්ට උසස් අධ්‍යාපනයේ යෙදීමට අවස්ථාව ලබාදිය යුතුයි. වෘත්තීය පුහුණුවට යන්න කැමති අයටත් ඒ අවස්ථාව දිය යුතුයි. අද ලෝකයට අවශ්‍ය නිපුණතා ඇති පුද්ගලයින් බිහිකිරීම ගැන අපි විශ්වාස කරනවා.
ඒ වගේම අපි විශ්වාස කරනවා විදේශ ආයෝජන ගෙන්වා ගත යුතුයි කියලා. අපි ආයෝජක හිතකාමී ප්‍රතිපත්ති අනුගමනය කළ යුතුයි. සාමාන්‍ය පුරවැසියන්ට අධික බදු බරක් දැරීමට සිදුවෙලා. සාධාරණ බදු ප්‍රතිපත්තියක් අනුගමනය කිරීම අත්‍යවශ්‍යයි. අපේ පරිපාලනය මේ ප්‍රතිපත්තිය කලින් කලට වෙනස් කරන්නේ නැහැ.”
රාජ්‍ය සේවක වැටුප් රුපියල් 25,000 කින් වැඩි කිරීම වැනි ආකර්ෂණීය ප්‍රතිපත්ති ලබාදී කිසිවකු ජනතාව රැවටිය යුතු නැති බව ද ඔහු මෙහිදී සඳහන් කළා.
“මැතිවරණ මත පදනම් වූ ප්‍රතිපත්ති අනුගමනය නොකළ යුතුයි. වැටුප් වර්ධකය උද්ධමනයට අනුරූප විය යුතුයි”
රාජ්‍ය සේවකයින්ට තාක්ෂණික කුසලතා පුහුණු කළ යුතු බව ද ඔහු කියා තිබෙනවා.
වැඩිදුරටත් ඔහු මෙහිදී පොරොන්දු වී ඇත්තේ විදේශ ගමන් බලපත්‍ර නිකුත් කිරීමේ ගැටලුවලට ඔහුගේ පාලනයකදී අනිවාර්යයෙන් විසදුම් ලබා දෙන බවයි.
