කොළඹ ප්‍රධාන මහේස්ත්‍රාත් අධිකරණ නඩු භාණ්ඩ කාමරයේ සුරක්ෂිතව තබා තිබූ රුපියල් කෝටි 24 ක් වටිනා හෙරොයින් කිලෝ 12ක් අතුරුදහන් වී ඇති බව අනාවරණය වී තිබෙනවා.
මෙසේ අතුරුදහන් වී ඇත්තේ මහා අධිකරණ නඩුවකට ඉදිරිපත් කිරීම සඳහා කොළඹ ප්‍රධාන මහේස්ත්‍රාත් අධිකරණ නඩු භාණ්ඩ කාමරයේ සුරක්ෂිතව තබා තිබූ හෙරොයින් තොගයකි.
රහස් පොලිස් නිලධාරියකු වශයෙන් පෙනී සිටි පුද්ගලයෙකු මෙම හෙරොයින් තොගය රැගෙන ගොස් ඇත්තේ රජය රස පරීක්ෂකවරයාට ඉදිරිපත් කිරීමට අවශ්‍ය බව පවසමිනි.
එම පුද්ගලයා තරිඳු යෝෂිත ලෙස පෙනී සිට ඇති බවයි වාර්තා වන්නේ.
මේ සම්බන්ධ සැකකරුවන් වහාම අත්අඩංගුවට ගෙන අධිකරණයට ඉදිරිපත් කරන ලෙස කොළඹ ප්‍රධාන මහේස්ත්‍රාත් තිළිණ ගමගේ මහතා රහස් පොලිසිය අධ්‍යක්ෂවරයාට අද (අගෝස්තු 29) නියෝග කරනු ලැබුවා.
රහස් පොලිසියෙන් යැයි පවසමින් අදාළ හෙරොයින් තොගය රැගෙන ගිය බව කියන තරිඳු යෝෂිත නැමැත්තා පිළිබඳ හෙළිකර ගැනීම සඳහා වහාම විමර්ශනයක් කිරීමටද ප්‍රධාන මහේස්ත්‍රාත්වරයා රහස් පොලිස් අධ්‍යක්ෂකවරයාට නියම කළා.
මෙම සිදුවීම සම්බන්ධයෙන් කොළඹ ප්‍රධාන මහේස්ත්‍රාත් අධිකරණයේ නඩු භාණ්ඩ භාරකරු ඇතුළු නිලධාරීන්ගෙන් ප්‍රශ්ණ කිරීමට ද නියමිතයි.
