මේ රට කවදා හෝ නිවැරදි මාවතකට ගෙන යා හැකිද යන්න අවිනිශ්චිත වන අතර කවුරු බලයට ආවත් රට පාලනය කළ හැක්කේ අවුරුදු තුනක් පමණක් බව ජාතික නාමල් උයනේ නිර්මාතෘ පූජ්‍ය වනවාසී රාහුල හිමියන් පවසා තිබෙනවා.
නාමල් උයනේ ඊයේ (29) පැවති මාධ්‍ය හමුවකට එක්වෙමින් උන්වහන්සේ කියා සිටියේ මෙවර ජනාධිපතිවරණයට ඉදිරිපත් වන අපේක්ෂකයින් වැඩි පිරිසක් නිරන්තරයෙන් තමන් බැහැ දැකීමට පැමිණෙන බවයි.
ජනතාව ආරක්‍ෂා කර රටේ භෞමික අඛණ්ඩතාව ආරක්‍ෂා කිරීම හා ආර්ථික සංවර්ධනය ප්‍රවර්ධනය කරන ලෙස ඔවුන්ට අවවාද අනුශාසනා කළ බව උන්වහන්සේ සඳහන් කළා.
“සෑම ජනාධිපති අපේක්ෂකයෙකුටම යම් යම් දර්ශන තිබෙනවා. සමහර අයගේ පසුබිම් කියවන විට, කතා කරන විට ජනාධිපතිවරණයේදී ලබාදුන් පොරොන්දු බොහොමයක් ඉටුකරන්න බැහැ.ජාතික අනන්‍යතාවක් ඇති කිරීමට හෝ අධ්‍යාපනික, සෞඛ්‍ය හා ආර්ථික සංවර්ධනයක් ඇති කිරීමට රටේ ක්‍රමයක් නැහැ.මේ රට දියුණු කරන්න නම් ජනතාවගේ ආකල්ප වෙනස් කළ යුතුයි.”උන්වහන්සේ කියා සිටියා.
මේ සියලු කරුණු සලකා බලන විට මේ රට නිවැරදි මාවතකට ගෙන යා හැකිද යන්න තමන්ට ගැටලුවක් බව ද වනවාසී රාහුල හිමියන් සඳහන් කළා.
