වීසා රහිත රටවල් 38ක් සඳහා සිංගප්පූරුව විසින් ක්‍රියාත්මක කරනු ලබන ‘one-chop’ ක්‍රමය වහාම ක්‍රියාත්මක කිරීමට අමාත්‍ය මණ්ඩලය අනුමැතිය ලබා දී ඇති බව සංචාරක අමාත්‍යාංශයේ උපදේශක හරීන් ප්‍රනාන්දු මහතා පවසනවා.
අයදුම්කරුවෙකුගේ විදෙස් ගමන් බලපත්‍රයේ එක් නිල මුද්‍රාවක් පමණක් සහිතව වීසා නිකුත් කිරීමට සහ වීසා දීර්ඝ කිරීමට මෙමඟින් අවස්ථාව සැලසෙනවා.
මෙයින් පෙන්නුම් කරන්නේ අමතර අනුමැතිය හෝ සංකීර්ණ ක්‍රියා පටිපාටි අවශ්‍ය නොවී වීසා බලපත්‍රය අනුමත කිරීම බව හරීන් ප්‍රනාන්දු මහතා ප්‍රකාශ කළා.
X පණිවිඩියක් නිකුත් කරමින් විදේශ කටයුතු අමාත්‍ය අලි සබ්‍රි මහතා ද මෙම තීරණය ක්‍රියාත්මක කිරීමත් සමග වීසා කවුළු තුළ තදබදය අඩු කිරීමට හැකිවනු ඇති බව පෙන්වා දී තිබුණා.
ශ්‍රී ලංකාව තුළ අලුතින් හඳුන්වා දී ඇති වීසා නිකුත් කිරීමේ ක්‍රමවේදයේ පවතින ගැටලුකාරී තත්වය හේතුවෙන් සංචාරකයින් කටුනායක ගුවන් තොටුපළේ ප්‍රමාදයකට මුහුණ දී සිටින බැවින් මෙම පියවර ගෙන තිබෙනවා.
2024 ඔක්තෝබර් 1 වැනිදා සිට රටවල් 35කට වීසා රහිතව ශ්‍රී ලංකාවට පැමිණීමට අවසර දීමට කැබිනට් මණ්ඩලය මීට පෙර තීරණය කර තිබුණා.
