ඇමරිකා එක්සත් ජනපදයේ ජෝර්ජියා ප්‍රාන්තයේ අගනුවර වන ඇට්ලන්ටා නගරයේ උසස් පාසලක වෙඩි තැබීමකින් සිව් දෙනෙකු මිය ගොස් 30කට අධික පිරිසක් තුවාල ලබා ඇති බව වාර්තා වෙනවා.
ඇට්ලන්ටා සිට ඊසාන දෙසින් සැතපුම් 45ක් පමණ දුරින් පිහිටි වින්ඩර් හි ඇපලාචි උසස් පාසලේ මෙම වෙඩි තැබීම වාර්තා වූ අතර සැකකරුවෙකු ලෙස පාසල් වයසේ පසුවන සිසුවෙකු අත්අඩංගුවට ගෙන ඇති බව බලධාරීන් සඳහන් කර තිබෙනවා.
සමාජ මාධ්‍යවල වෛරල් වෙමින් පවතින දර්ශන වලින් පෙන්නුම් කරන පරිදි කලබලයට පත් දෙමාපියන් තම දරුවන් රැගෙන යාමට එම ස්ථානයට පැමිණෙන ආකාරයත් පොලිසිය සහ ගිලන්රථ උසස් පාසල දෙසට ගමන් කරමින් තිබෙන ආකාරයත් සටහන් වී තිබෙනවා.
තුවාල ලැබූවන් හෙලිකොප්ටර් මඟින් ඉවත් කරන ආකාරයද එම දර්ශනවල සටහන් වුණා.
ජෝර්ජියා ආණ්ඩුකාර බ්‍රයන් කෙම්ප් X හි සටහනක් තබමින් සියලු රාජ්‍ය ආයතන දරුවන් ගලවා ගැනීම සඳහා ක්‍රියාකාරී වු බව සඳහන් කර තිබෙනවා.
