ගෞරවනීය සහ ප්‍රීතිමත් විශ්‍රාම ජීවිතයක් සහතික කිරීමේ පියවරක් ලෙස පෞද්ගලික අංශයේ සේවකයින් සඳහා දායක විශ්‍රාම වැටුප් ක්‍රමයක් හඳුන්වාදීමට ජාතික ජන බලවේගය යෝජනා කර ඇති බව ජාතික ජන බලවේගයේ නායක අනුර කුමාර දිසානායක මහතා ඊයේ (08) ප්‍රකාශ කළා.
විශ්‍රාමිකයින් බහුතරයක් දුක්ඛිත ජීවිත ගත කරන බව පවසමින් සෑම දෙනාම ගෞරවනීය හා ප්‍රීතිමත් විශ්‍රාමික ජීවිතයක් ගත කළ යුතු බව ඔහු කියා සිටියා.
අනුර දිසානායක මහතා මේ බව සඳහන් කළේ අන්තර් සමාගම් සේවක සංගමයේ (ICEU) 25 වැනි සමුළුව අමතමින්.
පෞද්ගලික අංශයේ සේවකයන් රටේ නිෂ්පාදනයට විශාල දායකත්වයක් ලබාදෙන බව ඔහු මෙහිදී සිහිපත් කළා.
“ඕනෑම කෙනෙකුට වැඩ කිරීමට කාල සීමාවක් තිබෙනවා. සෑම කෙනෙකුම ගෞරවාන්විත හා ප්‍රීතිමත් විශ්‍රාමික ජීවිතයක් ගත කළ යුතුයි. පෞද්ගලික අංශයේ සේවකයින් සඳහා දායක විශ්‍රාම වැටුප් ක්‍රමයක් හඳුන්වා දීමට අපට යෝජනාවක් තිබෙනවා.”
ජීවන වියදමට අනුව මාස හයකට වරක් පෞද්ගලික අංශයේ වැටුප් වැඩි කිරීමට වැටුප් වර්ධක පටිපාටියක් අවශ්‍ය බව ද අනුර දිසානායක මහතා සඳහන් කළා.
මීට දශක එකහමාරකට පෙර ආරම්භ වූ මිනිස්බල සැපයුම් ක්‍රමය නවීන ආකාරයේ වහල් වෙළඳාමක් ලෙස ඉදිරියට නොයා යුතු බව ද ඔහු අවධාරණය කර සිටියා.
“මෑන්පවර් සමාගම් හරහා සේවකයින් බඳවා ගැනීමේ ක්‍රමයක් මීට දශක එකහමාරකට පෙර ආරම්භ වුණා. එය නූතන වහල් වෙළඳාමට සමානයි. ඔබේ ශ්‍රමය කොමිස් මුදලකට නියෝජිතයෙකු හරහා වෙළඳාම් කරයි. එය යුක්ති සහගත නැහැ. එම ආකෘතිය දිගටම පැවතිය යුතු දෙයක් නෙවෙයි.”
