ජාතික ජන බලවේගයේ ජයග්‍රහණය නියත නමුත් අන්තිම මොහොතේ රනිල් වික්‍රමසිංහ කුමන හෝ ක්‍රමයකින් එම ජයග්‍රහණය ආපසු හරවාවි යැයි යන සැකයෙන් බියෙන් පසුවන මහජනතාව එවැනි බියක් තබා නොගත යුතු බව ජාතික ජන බලවේගයේ ජනාධිපති අපේක්ෂක අනුර කුමාර දිසානායක මහතා අවධාරණය කර තිබෙනවා.
ජනාධිපතිවරණය ක්‍රියාත්මක කරන රාජ්‍ය නිලධාරීන්ගෙන් බහුතරයක් මේ වන විට ජාතික ජන බලවේගයේ ජයග්‍රහණය වෙනුවෙන් කටයුතු කරමින් සිටින බැවින් එම යාන්ත්‍රනයේ කිසිදු වංචාවක් විය නොහැකි බව සිය විශ්වාසය බවයි ඔහු සඳහන් කළේ.
අනුර කුමාර දිසානායක මහතා මේ බව පැවසුවේ ඊයේ (10) ඔහුගේ ජයග්‍රහණය තහවුරු කිරීම සඳහා කුරුණෑගල ප්‍රදේශයේ පැවති ජන රැළියකට එක් වෙමිනි.
“රනිල් වික්‍රමසිංහ අන්තිම මොහොතේ මොනවා හරි කරයිද දන්නෑ කියලා ජනතාව කියනවා. අන්තිම වෙලාවේ කරන දේ තමයි. පරදිනවා සාමකාමීව ගෙදර යනවා. ගල් කැටයක් අතින් ගන්නැති බව සහතිකයි. ඇයි ඒ පැරදිලා පුරුදු නැති මනුස්සයෙක් නෙවෙයිනේ පැරදිලා පුරුදු නැත්නම් කණගාටුයි. යනවා.
තවත් කට්ටියක් කියනවා ඡන්ද කොලේ මොනවාහරි කරයිද කියලා. ඡන්ද පෙට්ටියට කොලේ දැම්මහම ඒක රැකලා ගණන් කරලා ආරක්ෂා කරල දෙන්නෙ රාජ්‍ය නිලධාරීන්, අද රාජ්‍ය නිලධාරීන්ගෙන් 80%කට වඩා ජාතික ජන බලවේගය එක්ක.
එතකොට කට්ටිය අහනවා පෙට්ටි මාරු කරයිද කියලා. නෑ.. ඡන්ද මධ්‍යස්ථානයට පෙට්ටිය බාර දෙනකොට ඒක ආරක්ෂා කරන්නේ පොලිසිය. සීල් කරලා කච්චේරියට අරගෙන එන්නෙ පොලිසිය. කච්චේරියේ ගණන් කරන තැන හලනකොට ආරක්ෂා කරන්නෙ පොලිසිය. හිස් පෙට්ටිය ඒක ආරක්ෂා කරන්නෙත් පොලිසිය. පොලිසිය ඉඩ දෙයිද ඡන්ද පෙට්ටිය උස්සන්න? uniform එක නැති වෙලාවට කිට්ටු වෙලා අහන්නකො. තැපැල් ඡන්ද කාටද කියලා. මාළිමාවට.. එනිසා පොලිසිය මහත්වරුත් වෙනදාට වඩා මේවා ආරක්ෂා කරනවා.
හැම දෙනාටම අවශ්‍ය වෙලා තියෙනවා මේ වෙනස. දැන් අපි මේ පළාත්වල එනකොට කුරුණෑගල පොලිසිය අපට ආරක්ෂාව දෙන්න බැඳිලා ඉන්නවා ඒක රාජකාරිය. හැබැයි රාජකාරිය කරන විදියට පේනවා රාජකාරිය විතරක් නෙවෙයි ඇඟෙන් ඇඟෙන් කරන්නේ කියලා. මේ පරිවර්තනයට හැමෝම එකතු වෙලා තියෙන්නේ.”
