ලෙබනනයේ බේරූට් අගනුවර ඇතුළු ප්‍රදේශ ගණනාවක සිදු වූ පිපිරීම් මාලාවකින් හිස්බුල්ලා සටන්කාමීන් 09 දෙනෙකු මියගොස් 3,000කට ආසන්න සංඛ්‍යාවක් තුවාල ලබා තිබෙනවා.
ලෙබනනයේ ක්‍රියාත්මක හිස්බුල්ලා සංවිධානයේ සාමාජිකයින් සිය පණිවුඩ හුවමාරු සඳහා යොදා ගන්නා “පේජර් පණිවුඩ හුවමාරු” යන්ත්‍ර එකවර පුපුරා යෑමෙන් ඔවුන් මෙලෙස තුවාල ලබා ඇති බවයි වාර්තා වන්නේ.
පේජර් පණිවිඩ හුවමාරු යන්ත්‍ර සිය ගණනක් ලෙබනනය පුරා එකවර පුපුරා ගියේ මුළු රටම කම්පනයට ලක් කරමිනි. එක් වෙළැඳසලක කැෂියර් එක අසලද මෙම යන්ත්‍රයක් පුපුරා ගොස් තිබුණා.
විදෙස් මාධ්‍ය වාර්තාවල තුවාල පැබූ පුද්ගලයින්ගෙන් 200ක පමණ පිරිසකගේ තත්ත්වය බරපතළ බව සඳහන්.
මාර්ග අසල, සාප්පු සංකීර්ණ, වෙළෙඳසැල්වලදී මෙන්ම නිවෙස් ආශ්‍රිතව මෙම පිපිරීම් සිදුව තිබෙන බවට විදෙස් මාධ්‍ය වාර්තා කරනවා.
මෙම ප්‍රහාර මාලාවට ඊශ්‍රායලය වගකිව යුතු බව හිස්බුල්ලා සංවිධානය චෝදනා කර තිබෙනවා.
ඊශ්‍රායල් ආරක්ෂක අංශ විසින් අලුතින් හඳුන්වා දී තිබෙන රේඩියෝ සංඥා ජෑමර් පද්ධතිය උපයෝගී කර ගනිමින් මෙම සයිබර් මෙහෙයුම සිදුකර තිබෙන බව සඳහන්.
හිස්බුල්ලා ප්‍රධානී සෙයිද් හසන් නස්රල්ලාට පිපිරීම්වලින් හානියක් සිදුවී නොමැති බව එම සංවිධානය පවසනවා.
මේ අතර ලෙබනනයේ ශ්‍රී ලංකා තානාපතිවරයා පවසන්නේ කිසිදු ශ්‍රී ලාංකිකයෙකු තුවාල ලබා නොමැති බවයි.
කෙසේ වෙතත් ඉරාන රාජ්‍ය මාධ්‍ය වාර්තාවලට අනුව ලෙබනනයේ ඉරාන තානාපති Mojtaba Amani ද පිපිරීම්වලින් තුවාල ලබා ඇති බව සඳහන්.
