ඇමරිකාවේ දෙවන විශාලතම නගරය වන ලොස් ඇන්ජලීස් අඟහරුවාදා (07) ඇති වූ ලැව් ගිනි හේතුවෙන් විශාල විනාශයකට මුහුණ දුන්නා.
ගොඩනැගිලි 1,000කට අධික ප්‍රමාණයක් ගිනිබත් වූ අතර ගින්නේ වේගය සහ රුදුරු බව හමුවේ එරට ගිනි නිවන අංශ යටපත් වූ බවයි මාධ්‍ය වාර්තා පෙන්වා දෙන්නේ.
බදාදා (ජනවාරි 08) එරට බලධාරීන් තහවුරු කරනු ලැබුවේ එක්සත් ජනපදයේ ලොස් ඇන්ජලීස් නගරයේ පැතිර යන විනාශකාරී ලැව්ගිනිවලින් මියගිය සංඛ්‍යාව පහ දක්වා ඉහළ ගොස් ඇති බවයි. එය තවදුරටත් ඉහළ යා හැකි බවට ද ඔවුන් අනතුරු අඟවනු ලැබුවා.
විද්‍යාඥයින්ට අනුව, ආපදාවට වගකිව යුතු කාලගුණික රටා වෙනස් වීම පිටුපස ඇත්තේ මිනිසා විසින් ඇති කරන ලද දේශගුණික විපර්යාසයන්ය.
කාලගුණ විද්‍යාඥයින් පෙන්වා දෙන්නේ මෑත මාසවල කාලගුණයේ පෙර නොවූ විරූ වියළි බව සහ අධික සුළං ලැව්ගිනි ඇතිවීමට ප්‍රධානම හේතුව බවයි.
ගින්නෙන් වැඩිම හානි සිදු වූ බවට වාර්තා වන්නේ ඇල්ටඩීනා සහ සිල්මාර් අසල්වැසි ප්‍රදේශ සහ සුවිශේෂී පැසිෆික් පලිසේඩ්ස් වැනි ප්‍රදේශයන් වන අතර හොලිවුඩ් A ශ්‍රේණියේ තරු රැසක් ජීවත් වන එම ප්‍රදේශවල ඔවුන්ගේ සුඛෝපභෝගී නිවාස ඇතුලු දේපළවලට දැඩි හානි සිදුව ඇති බවයි වාර්තා වන්නේ.
