පාර්ලිමේන්තු මන්ත්‍රීවරුන්ට පරිගණක, ඡායා පිටපත් යන්ත්‍ර ෆැක්ස් යන්ත්‍ර සහ ජංගම දුරකථන මිලදී ගැනීම සඳහා මුළු ධුර කාලයටම රුපියල් ලක්ෂ අටක මුදලක් ලබාදීමට රජය තීරණය කර ඇතැයි වාර්තා වෙනවා.
පාර්ලිමේන්තු මන්ත්‍රීවරුන්ට මෙම භාණ්ඩ මිලදී ගැනීම සඳහා මෙයට පෙර රුපියල් ලක්ෂ පහ බැගින් ලක්ෂ දහයක් සිය ධුර කාලය තුළ වාර දෙකකදී ලබාදීමට කටයුතු කෙරුණා.
මහජන ආරක්ෂක සහ පාර්ලිමේන්තු කටයුතු අමාත්‍ය ආනන්ද විජය පළ මහතා ඉකුත් පෙබරවාරි 2වෙනිදා ඉදිරිපත් කළ අමාත්‍ය මණ්ඩල සංදේශයක් අනුව මෙම මුදල් ලබාදීමට අනුමැතිය ලැබී තියෙනවා.
භාණ්ඩ මිලදී ගැනීමෙන් පසු ක්ෂය වටිනාකම වාරික පදනමින් අය කර ගැනීමට කටයුතු කෙරෙනු ඇති. එසේම මුදල් අය කර ගැනීමෙන් පසු එම භාණ්ඩවල අයිතිය මන්ත්‍රීවරයාට පැවරෙන බව මහජන ආරක්ෂක සහ පාර්ලිමේන්තු කටයුතු අමාත්‍යාංශය ඉදිරිපත් කළ අමාත්‍ය මණ්ඩල සන්දේශයේ දැක්වෙනවා.
මන්ත්‍රීවරුන් දිස්ත්‍රික් මට්ටමින් පවත්වාගෙන යන කාර්යාලවල කටයුතු සහ දිස්ත්‍රික් සංවර්ධන කටයුතු වේගවත් කිරීම සඳහා මෙම උපකරණ ලබා දීම සිදු කෙරෙනවා.
