ශ්‍රී ලංකාවේ ප්‍රථම ශුක්‍රානු බැංකුව කොළඹ කාසල් රෝහලේ ස්ථාපිත කර ඇත්තේ මඳ සරු භාවය පිළිබඳ අභියෝගවලට මුහුණ දෙන සියලුම දෙනාට නව බලාපොරොත්තුවක් වෙමිනි.
එය පිරිමි පාර්ශවයේ මද සරු භාවය හේතුවෙන් දරුවන් නොමැති කාන්තාවන්ට හා අවිවාහක දරුවන් හදා ගැනීමට අවශ්‍ය තරුණියන් වෙනුවෙන් ශුකානු ප්‍රදානය කිරීම සඳහා ඉඩ සලසන්නකි.
එම අරමුණු වෙනුවෙන් ලොව පුරා බහුලව භාවිත කරන ක්‍රමවේදයක් වන මෙය ශ්‍රී ලංකාවේ හඳුන්වා දෙන ප්‍රථම අවස්ථාව වන අතර මෙම ප්‍රවෘත්තිය මාධ්‍ය හා සමාජ මාධ්‍යවල පළවීමත් සමඟ එයට බොහෝ දෙනෙකුගෙන් විවිධ ප්‍රතිචාර දක්නට ලැබුණා.
වැඩිමනත් ප්‍රතිචාර දක්වා තිබුණේ හුදෙක් විනෝදයට හා හාස්‍යයට ලක් කරමිනි. එම සංකල්පය පිළිබඳ අපේ සමාජය තුළ පැවති දැනුම අවම වීම හා එයට සංවේදී නොවීම පිළිබඳ බරපතල ප්‍රශ්ණයක් එම ප්‍රතිචාරවලින් පිළිබිඹු කෙරුණා.
ශුක්‍රාණු බැංකුවක් යනු අනාගත භාවිතය සඳහා විශේෂයෙන් අභ්‍යන්තර ගැබ් ගැනීම (IVF) වැනි සරුභාවය පිළිබඳ ප්‍රතිකාර සඳහා පරිත්‍යාග කරන ලද මිනිස් ශුක්‍රාණු එකතු කිරීම, ගබඩා කිරීම සහ සැපයීම සඳහා පහසුකම් ලබා දෙන තැනකි.
මෙම සේවාව ක්‍රියාත්මක වන්නේ දැඩි පෞද්ගලිකත්වය සහ රහස්‍යභාවය යටතේය.
රෝහල් අධ්‍යක්ෂ වෛද්‍ය අජිත් කුමාර දන්තනාරායන මහතා සඳහන් කරන්නේ පරිත්‍යාගශීලීන්ගේ පෞද්ගලිකත්වය සහ රහස්‍යභාවය සම්පූර්ණයෙන් ආරක්ෂා කරන බවයි.
සරුභාවය පිළිබඳ ගැටලු ඇති අය වෙනුවෙන් පරිත්‍යාග කිරීමට පමණක් නොව වෛද්‍ය ප්‍රතිකාර (පිළිකා ප්‍රතිකාර වැනි) හේතුවෙන් සරු භාවය පිළිබඳ අභියෝග අත්විඳිය හැකි පුද්ගලයින්ට හෝ පසුකාලීන භාවිතය සඳහා තම සරු භාවය ආරක්ෂා කර ගැනීමට කැමති අයටත් ශුක්‍රාණු බැංකු ඉතා වැදගත් වෙනවා.
ආරක්ෂාව සහ ගුණාත්මකභාවය සහතික කිරීම සඳහා පරිත්‍යාගශීලීන්ට වෛද්‍ය පරීක්ෂණ මාලාවකට භාජනය වීමට සිදු වීම මෙහි විශේෂත්වයයි.
මේ නිසා ප්‍රජනක සෞඛ්‍යයේ සැලකිය යුතු ඉදිරි පියවරකට දායක වෙමින් ශුක්‍රාණු පරිත්‍යාග කිරීමෙන් මුලපිරීමට සහාය වන ලෙසට රෝහල පුරුෂ පාර්ශවයට දැනුම් දී තියෙනවා.
ශුක්‍රානු එකතු කරන ක්‍රමවේදය කුමක්ද?
සිය ශුක්‍රානු පරිත්‍යාග කළ හැකි බව දැනගත් පසු පිරිමි පාර්ශවයට මතුවු ප්‍රධාන ගැටලුවක් වුණේ එය ලබා දෙන ආකාරයයි.
ශුක්‍රාණු සාම්පල එකතු කරනු ලබන්නේ පරිත්‍යාගශීලීන්ගෙන් හෝ ඔවුන්ගේ සරුභාවය ආරක්ෂා කර ගැනීමට කැමති පුද්ගලයින්ගෙනි.
අදාළ ශුක්‍රානු බැංකුවට අයත් සායනයක් තුළ ස්වයං වින්දනය මඟින් සාම්පල ලබා දීම මේ සඳහා වඩාත් පොදු ක්‍රමය වන නමුත් සමහර අවස්ථාවලදී, සාම්පලයක් නිවසේදීම නිපදවා පැය 24ක් ඇතුළත රසායනාගාරයකට ලබා දිමේ ක්‍රමය ද ලෝකය තුළ භාවිත කරයි. නියැදිය රසායනාගාරය විසින් අනුමත කරන ලද උපකරණයක රැගෙන යා යුතු අතර ශරීර උෂ්ණත්වයට හැකි තරම් සමීපව පැවතිය යුතුය.
ශ්‍රී ලංකාව තුළ එය ක්‍රියාත්මක කෙරෙන ආකාරය පිළිබඳ වැඩිදුර තොරතුරු ඉදිරි කාල සීමාවේ දී රෝහල මඟින් ලබා ගැනීමට හැකියාව ලැබෙනු ඇති
එකතු කරන ලද ශුක්‍රාණු පසුව අනාගත භාවිතය සඳහා එහි ශක්‍යතාව සහතික කිරීම සඳහා විශේෂිත ශිල්පීය ක්‍රම භාවිතා කරමින් ශීතකරණය කරනු ලබනවා.
ශීත කළ ශුක්‍රාණු සාම්පල දිගුකාලීන සංරක්ෂණය සහතික කරමින් ඉතා අඩු උෂ්ණත්වවලදී ද්‍රව නයිට්‍රජන් ටැංකිවල ගබඩා කිරීම ඊළඟ අදියරයි.
ශුක්‍රානු පරිත්‍යාග කිරීමේ අතුරු ආබාධ තියෙනවද?
ශුක්‍රාණු පරිත්‍යාග කිරීම සාමාන්‍යයෙන් පරිත්‍යාගශීලියාගේ සරු භාවයට හෝ සෞඛ්‍යයට අහිතකර ලෙස බලපාන්නේ නැති අතර මෙම ක්‍රියාවලිය සැලසුම් කර ඇත්තේ ප්‍රජනක සෞඛ්‍යය අවදානමට ලක් නොවන බව සහතික කරමිනි. නමුත් පරිත්‍යාගශීලීන් තම පරිත්‍යාගයේ විභව චිත්ත වේගයන් හා නීතිමය ඇඟවුම් සලකා බැලිය යුතුය.
එමෙන්ම පරිත්‍යාගශීලීන්ගේ ශුක්‍රානු සහකරුවන්ගෙන් ලබාගන්නා ශුකානුවලටත් වඩා ආරක්ෂිතය.ඒ පරිත්‍යාගශීලීන් ඒ සඳහා සම්පුර්ණ කළ යුතු ආරක්ෂිත පටිපාටියක් ඇති හෙයිනි.
