චීනයේ අධ්‍යාපන අමාත්‍යාංශය ප්‍රාථමික පාසල් සිසුන්ට තම ගෙදර වැඩ සම්පූර්ණ කිරීම සඳහා කෘතිම බුද්ධි (AI) මෙවලම් තනිව භාවිතා කිරීම තහනම් කර තිබෙනවා.
මෙම නියෝගය ලබා දෙමින් චීන අධ්‍යාපන බලධාරීන් පෙන්වා දී ඇත්තේ AI අධ්‍යාපනයේ ආධාරක මෙවලමක් ලෙස පමණක් සේවය කළ යුතු බවයි.
මධ්‍යම පාසල් සිසුන්ට AI-ජනනය කරන ලද අනතර්ගතවල තාර්කික ව්‍යුහය අධ්‍යයනය කිරීමට පමණක් අවසර ලබා දී ඇති අතර උසස් පාසල් සිසුන්ට තාක්ෂණයට අදාළ අධ්‍යයන කටයුතු සඳහා AI භාවිතා කළ හැකිය.
ග්ලෝබල් ටයිම්ස් පුවත්පතට අනුව AI සහායක මෙවලමක් ලෙස පවතින බවත් එය ශ්‍රේණිගත කිරීම, පිළිතුරු ජනනය කිරීම හෝ සංවේදී දත්ත හැසිරවීම සඳහා භාවිතා නොකරන බවට සහතික කිරීමට ගුරුවරුන්ට උපදෙස් ලබා දී තිබෙනවා.
එමෙන්ම ඉගැන්වීම්වලදී AI ඇතුළත් කිරීමට දිරිමත් කළ යුතු අතරම ඔවුන් දත්ත ආරක්ෂණ පියවරයන් ද ශක්තිමත් කළ යුතුය. පුද්ගලික තොරතුරු ආරක්ෂා කිරීම සහ තාක්ෂණය මත අධික ලෙස රඳා පැවතීම වැළැක්වීම සඳහා තම දරුවන්ගේ AI භාවිතය අධීක්ෂණය කරන ලෙස රජය දෙමව්පියන්ගෙන් ද ඉල්ලා ඇති බවයි වැඩිදුරටත් වාර්තා වන්නේ.
