ඊශ්‍රායලය සමඟ යුද්ධය ආරම්භ වී දින තුනක් ඇතුළත ඉරාන පුරවැසියන් 224 දෙනෙකු ජීවිත අහිමි වෙද්දී ඉරාන ප්‍රහාරවලින් ඊශ්‍රායලයේ පුද්ගලයින් 17 දෙනෙකුට දිවි අහිමි වී ඇති බව වාර්තා වෙනවා.
ඊශ්‍රායල ප්‍රහාරවලින් ඉරානයේ 1,200 කට වැඩි පිරිසක් තුවාල ලැබූ අතර ඊශ්‍රායලයේ 390 දෙනෙකු තුවාල ලබා ඇති බව සඳහන්ය.
ඉරාන සෞඛ්‍ය අමාත්‍යාංශයේ ප්‍රකාශක හොසේන් කර්මන්පූර් සමාජ මාධ්‍ය වේදිකාවක් වන X හි ඉරානයේ මියගිය අයගෙන් සියයට 90 ක් සිවිල් වැසියන් බව සඳහන් කර තිබෙනවා.
එපමණක් නොව ඉරාන විප්ලවවාදී ආරක්ෂක හමුදාව පැවසුවේ ඊශ්‍රායල ප්‍රහාරවලින් බුද්ධි අංශ ප්‍රධානී මොහොමඩ් කසෙමි සහ ඉස්ලාමීය රාජ්‍යයේ තවත් ජෙනරාල්වරුන් දෙදෙනෙකු මිය ගිය බවයි. ඉරානයට එහි අනෙකුත් ඉහළ නිලධාරීන් සහ න්‍යෂ්ටික විද්‍යාඥයින් කිහිප දෙනෙක්ද අහිමි වුණා.
මේ අතර, ඊශ්‍රායලයේ, පුද්ගලයින් 17 දෙනෙකු මිය ගොස් 390 දෙනෙකු තුවාල ලබා තිබියදීත් ඊශ්‍රායල අගමැති බෙන්ජමින් නෙතන්යාහු පවසා ඇත්තේ තම රට යුද්ධය දිගටම කරගෙන යන බවයි. ඇමරිකානු ප්‍රවෘත්ති ඒජන්සියක් වන ෆොක්ස් නිවුස් සමඟ සම්මුඛ සාකච්ඡාවකදී නෙතන්යාහු, ඊශ්‍රායලය ඉරානයේ න්‍යෂ්ටික මධ්‍යස්ථාන විනාශ කිරීම සඳහා සිය හමුදා මෙහෙයුම දිගටම කරගෙන යන බව සඳහන් කරනු ලැබුවා.
