දිගුකාලීන සතුරෙකු දුර්වල කිරීම සඳහා අවදානම් සහගත ලෙස ඊශ්‍රායලය දරන උත්සාහයට සෘජුවම සම්බන්ධ වෙමින් එක්සත් ජනපදය ඉරානයේ න්‍යෂ්ඨික පහසුකම් තුනකට පහර දුන් බව ජනාධිපති ඩොනල්ඩ් ට්‍රම්ප් තහවුරු කර තිබෙනවා.
ඒ අනුව මෙය ඉරාන සහ ඊශ්‍රායල ගැටුමට ඇමරිකාව නිල වශයෙන් මැදිහත් වූ අවස්ථාව ලෙස සැලකිය හැකිය.
“අප ඉරානයේ න්‍යෂ්ඨික මධ්‍යස්ථානවලට සාර්ථක ප්‍රහාරයක් එල්ල කළා. ෆොර්ඩොව්, නටාන්ස් සහ ඇස්ෆහාන් ඇතුළු ඉරානයේ න්‍යෂ්ටික මධ්‍යස්ථාන තුනට එල්ල කළ ප්‍රහාරය සාර්ථකව අවසන් කීරිමට අපට හැකි වුණා.” ට්‍රම්ප් Truth සමාජ මාධ්‍ය අවකාශයේ දැමූ සටහනක සඳහන් වුණා.
“සියලුම ගුවන් යානා දැන් ඉරාන ගුවන් සීමාවෙන් පිටත පවතී. සම්පූර්ණ බෝම්බ තොගයක් ඔවුගේ ෆොර්ඩොව් හි මූලික මධ්‍යස්ථානයට එල්ල කළා. සියලුම ගුවන් යානා ආරක්ෂිතව ආපසු ගෙදර යමින් තිබෙනවා.” ප්‍රහාරයෙන් පසු ඩොනල්ඩ් ට්‍රම්ප් ජාතිය අමතමින් කතාවක් සිදු කර තිබෙනවා.
ජනාධිපති ඩොනල්ඩ් ට්‍රම්ප් ධවල මන්දිරයේ සිට කළ ප්‍රකාශයෙන් ඉරාන න්‍යෂ්ඨික මධ්‍යස්ථාන තුනකට එල්ල කළ ඇමරිකානු හමුදා ප්‍රහාර “විශිෂ්ට මිලිටරි සාර්ථකත්වයක්” ලෙස විස්තර කරනු ලැබුවා.
ඉරාන ඊශ්‍රයාල යුධ ගැටුමට මෙම ඇමරිකානු අත පෙවීම සිදුවූයේ ඇමරිකාව මැදිහත් වුවහොත් අනිවාර්යෙන් පහර දෙන බවට ඉරාන තර්ජන මධ්‍යයේය. එක්සත් ජනපදය සිය න්‍යෂ්ඨික මධ්‍යස්ථානවලට ප්‍රහාර එල්ල කළ බව ඉරානය පිළිගනු ලැබුවද ප්‍රහාර බරපතල නොවන බවයි සඳහන් කර ඇත්තේ.
ඉරානයේ න්‍යෂ්ටික ඒජන්සිය එරට න්‍යෂ්ටික මධ්‍යස්ථාන තුනකට එල්ල කරන ලද එක්සත් ජනපද ප්‍රහාර හෙළා දැක ඇති අතර එහි න්‍යෂ්ටික වැඩසටහන “කිසි විටෙකත් නතර නොකරන” බවට ප්‍රතිඥා දී ඇති බව ඉරාන මාධ්‍ය වාර්තා කර තිබෙනවා.
