“බිරිඳක් කන්‍යාවක් ලෙස සොයන්න එපා. හොඳ පුරුදු ඇති බිරිඳක් සොයාගන්න. කන්‍යාභාවය එක රැයින් විනාශ වේ. නමුත් හොඳ පුරුදු සදහටම පවතී”
මෙය පසු ගිය කාලයේ ප්‍රියංකා චොප්රා විසින් ප්‍රකාශ කරන ලද්දැක් යැයි සමාජ මාධ්‍යවල බෙහෙවින්ම ප්‍රචාරය වූ වැකියකි.
එම ප්‍රකාශය කරන ලද බවට වන ප්‍රියාංකාගේ යැයි කියන හඬ පටයක්ද සමාජ මාධ්‍යවල වෛරල් වී තිබුණා.
මෙම ප්‍රකාශයට ඉන්දීය සමාජයෙන් ප්‍රියංකාට ලැබී තිබුණේ එතරම් හොඳ ප්‍රතිචාර නොවේ.
ස්ත්‍රිය පිළිබඳ සම්ප්‍රාදායික චින්තනයක් සහිත ඉන්දීය සමාජය මෙම ප්‍රකාශය හාස්‍යයට ලක් කරතිබූ අතර ප්‍රියංකාට විවිධ ආකාරයෙන් අපහාස මතු කිරීමටද එය යොදා ගෙන තිබුණා.
කෙසේ වෙතත් ප්‍රියංකා ඇගේ සමාජ මාධ්‍ය ඔස්සේ පසුගිය දා මෙම අසත්‍ය ප්‍රචාරයට එරෙහි වෙමින් ප්‍රකාශ කළේ මෙම ප්‍රකාශය සහ ඇගේ හඬ AI ඔස්සේ කෘතිමව නිර්මාණය කරනු ලැබූවක් බවයි.
“මේ මම, මා විසින් ප්‍රකාශ කරන ලද්දක් හෝ මගේ හඬ නොවේ. එය ඔන්ලයින් ඇති පමණින් එය සත්‍ය නොවේ. ව්‍යාජ අන්තර්ගතයන් නිර්මාණය කිරීම දැන් වෛරල් වීමට පහසු ක්‍රමයකි.”
ඇය එහිදී වැඩිදුරටත් තම අනුගාමිකයින්ගෙන් ඉල්ලා සිටියේ ඔවුන් අන්තර්ජාලය හරහා දකින අන්තර්ගතය විශ්වාස කිරීමට හෝ බෙදා ගැනීමට පෙර විවේචනාත්මකව සිතන ලෙසයි.
“එවැනි අන්තර්ගතයක් පරීක්ෂා කිරීමට මිනිත්තුවක් ගත කරන්න. ඔබ පසුකර යන සියල්ල විශ්වාස නොකරන්න. මාර්ගගත ලෝකයේ ආරක්ෂිතව සිටින්න.” ඇය කියා තිබෙනවා.
