අමෙරිකා එක්සත් ජනපදය ශ්‍රී ලංකාවෙන් එරටට ආනයනය කරනු ලබන භාණ්ඩ සඳහා පනවනු ලැබූ 30%ක තීරුබදු තවදුරටත් අඩු කර ගැනීමට පියවර ගන්නා බව ජනාධිපති අනුර කුමාර දිසානායක මහතා පවසා තිබෙනවා.
ජනාධිපතිවරයා මේ බව සඳහන් කළේ අමෙරිකා එක්සත් ජනපදය ක්‍රියාත්මක කිරීමට නියමිත නව අන්‍යෝන්‍ය තීරු බදු ප්‍රතිපත්තියට අදාළ සාකච්ඡාවල ප්‍රගතිය, වර්තමාන තත්ත්වය සහ මෙම තීරු බදු ප්‍රතිපත්තිය ක්‍රියාත්මක කිරීම සමඟ මුහුණ දීමට සිදුවන ආර්ථික අභියෝග පිළිබඳව අපනයන කර්මාන්තයට අදාළ සියලු පාර්ශ්ව සමඟ අද (12) පෙරවරුවේ ජනාධිපති කාර්යාලයේ පැවති සාකච්ඡාවට එක් වෙමිනි.
ඇමරිකාව පසුගිය අප්‍රේල් මාසයේ ශ්‍රී ලංකාවට පැනවූ 44%ක තීරුබදු අනුපාතය 30%දක්වා පහත හෙළීම රජය ඇමරිකානු රජය සමඟ කළ සාකච්ඡාවල ප්‍රතිඵලයක් බව සඳහන් කළ ජනාධිපතිවරයා තවදුරටත් එම අනුපාතය පහත හෙළීමට අවශ්‍ය සාකච්ඡාවල අඛණ්ඩව නිරත වන බව ජනාධිපතිවරයා කියා සිටියා.
එහිදී මෙරට ආර්ථිකයට, ව්‍යාපාරවලට, ව්‍යාපාරික ප්‍රජාවට සහ ජන ජීවිතයට වඩාත් හිතකර ලෙස සංශෝධන සිදු කර ගැනීම රජයේ අපේක්ෂාව බව ජනාධිපතිවරයා සඳහන් කරනු ලැබුවා.
මෙම අභියෝගාත්මක අවස්ථාවේදී එහි ධනාත්මක පැතිකඩ පිළිබඳ අවධානය යොමු කරමින් නව වෙළෙඳපොළ ප්‍රවේශයන් හඳුනා ගැනීම සඳහා රජය සහ පෞද්ගලික අංශය ඒකාබද්ධව ක්‍රියාත්මක වීමේ අවශ්‍යතාව සහ අපනයන විවිධාංගීකරණය සඳහා ඇති අවස්ථාවන් පිළිබඳව මෙහිදී අවධානය යොමු කෙරුණා.
