වෙඩි වැදීමක් හේතුවෙන් බරපතල අසාධ්‍ය තත්ත්වයෙන් දින ගණනාවක් ප්‍රතිකාර ලබමින් සිටි ‘භාතිය’ හස්තියා අද (15) උදෑසන මිය ගොස් තිබෙනවා.
ප්‍රතිකාර කරමින් සිටි අතර හස්තියා පොල්පිතිගම ප්‍රදේශයේ කැලය මැද වතුර වළකට වැටීමෙන් දින ගණනාවක් තිස්සේ ඉතා පීඩාකාරී තත්ත්වයට පත්ව සිටියා.
වෙඩි වැදීමකින් පසු, පේරාදෙණිය විශ්ව විද්‍යාලයේ පශු වෛද්‍ය පීඨයේ හිටපු පීඨාධිපති මහාචාර්ය අශෝක දංගොල්ල මහතාගේ නායකත්වයෙන් යුත් කණ්ඩායමක් පැය විසිහතර පුරා හස්තියාට ප්‍රතිකාර ලබා දීම සඳහා කටයුතු කරනු ලැබූ අතර හස්තියාගේ තත්ත්වය දිනෙන් දින නරක අතට පත්වන බවයි වාර්තා වුණේ.
කෙසේ වෙතත්, මාංශ පේශි ක්ෂය වීම සහ රුධිර සංසරණය දුර්වල වීම හේතුවෙන් ඇතා අසාධ්‍ය තත්ත්වයේ පසුවූ බව පශු වෛද්‍යවරු සඳහන් කරනු ලැබුවා.
දින කිහිපයක් ප්‍රතිකාර ලබා ගැනීමෙන් පසු, සුවය ලබා ගැනීමට සහාය වීම සඳහා ඊයේ (14) ඇතා දොඹකර ආධාරයෙන් අනිත් පැත්තට හරවනු ලැබූ අතර තත්ත්වය වඩාත් අසාධ්‍ය බව පශු වෛද්‍යවරුන්ගේ නිගමනය වී තිබුණා.
‘භාතිය’ යනු වයස අවුරුදු 30 ත් 35 ත් අතර වයසැති, තේජාන්විත හස්ති රාජයෙක් වන අතර දැඩි ලෙස අසාධ්‍ය තත්වයෙන් දින ගණනක් පීඩා ලැබුවේ හිත් පිත් නැති මිනිසෙක් කණ හරහා යාමට එල්ල කරනු ලැබූ වෙඩි පහරක් නිසාවෙනි.
