ඉන්දීය ක්‍රිකට් තරුවක් හා කාන්තා ක්‍රිකට් කණ්ඩායමේ උප නායිකාව වන ස්ම්‍රිති මන්දානාගේ ඊයේ (23) දිනයේ පැවැත්වීමට නියමිතව තිබුණු විවාහ උත්සවය අනපේක්ෂිත ලෙස නතර කරනු ලැබූ බව ඉන්දීය මාධ්‍ය වාර්තා කර තිබෙනවා.
ඒ ඇගේ විවාහ මංගල්‍යය වෙනුවෙන් සූදානම් වෙමින් සිටින අතරතුර ඇගේ පියා වන ශ්‍රී නිවාස් මන්දානාට හදිසි හෘද්‍යාබාධයක් වැළඳීමෙන් පසු රෝහල්ගත කිරීමට සිදුවීම නිසාය.
සංග්ලි ප්‍රදේශයේ ඇගේ නිවසේ පැවැත්වීමට නියමිතව තිබූ මංගල්‍යය උත්සවය මේ නිසා කල් දැමීමට සිදුවූ බවයි ඇගේ කළමනාකරුවන් විසින් තහවුරු කරනු ලැබුවේ.
ඇයගේ නිවස විවාහ උත්සවය වෙනුවෙන් අලංකාර කර තිබියදී විවාහයට ඉතිරිව තිබුණේ පැය කිහිපයක් පමණි.
ඔවුන් උත්සවය සඳහා අවශ්‍ය සියලු කටයුතු අවසන් කරමින් සිටියදී පියා රෝගාතුර වී තිබෙනවා. මන්දානා මහතා වහාම හදිසි ප්‍රතිකාර සඳහා රෝහලකට ඇතුළත් කරනු ලැබූ බවයි වාර්තා වුණේ. ස්ම්‍රිති සහ ඇගේ පවුලේ උදවිය සිදුවීම දැනගත් විගස රෝහලට පැමිණි බව පවුලේ ආරංචි මාර්ග සඳහන් කර තිබෙනවා.
පියාගේ තත්ත්වය දැනට ස්ථාවර බව වෛද්‍යවරුන් දන්වනු ලැබුවද ස්ම්‍රිතිගේ විවාහ උත්සවය දින නියමයක් නොමැතිව කල් තැබුණු බව සඳහන් වෙනවා.
ස්ම්‍රිති මන්දනා විවාහ වීමට නියමිතව සිටියේ සංගීතඥයකු වන පලාෂ් මුචාල් සමඟයි. මෙම අවිනිශ්චිත සිදුවීමත් සමඟ ඇගේ නිවසේ අලංකාර සැරසිලි ඉවත් කිරීමට පියවර ගෙන තිබුණා.
