2029 ජනපතිවරණයට මෙරට ප්රබල දේශපාලන පවුල් පසුබිමකින් පැවත එන විමුක්ති කුමාරණතුංග ඉදිරිපත් වන බව මේ වන විට දේශපාලන ක්ෂේත්රයේ කතිකාවට ලක් වන ප්රධාන මාතෘකාවකි.
එහෙත් එය ඇතම් පාර්ශව විසින් බැහැර කරනු ලැබුවේ ඔහුගේ මව වන හිටපු ජනපතිනි චන්ද්රිකා බණ්ඩාරනායක එයට කිසිසේත් ඉඩ නොදෙන බව පවසමිනි.
මුල්කාලීනව චන්ද්රිකා මැතිනියගේ දැඩි ස්ථාවරය වූයේද සිය දරුවන් කිසි දිනක දේශපාලනයට නොඑන බවයි. පවුල් පසුබිමේ පියා වන එස්.ඩබ්.ආර්.ඩී බණ්ඩාරනායක මහතා සහ ඇගේ ආදරණීය සැමියා වන විජය කුමාරණතුංග මහතා දේශපාලනය නිසා ඝාතනය වීම වැනි අමිහිරි අත්දැකීම් එයට හේතු වූවා විය හැකිය.
එහෙත් මෑතක සිට ඇගේ එම දැඩි ස්ථාවරය වෙනස් වී ඇති ආකාරය පැහැදිලිව දක්නට ලැබෙන්නකි.
ඇය මේ වන විට ජනතා විමුක්ති පෙරමුණේ දේශපාලන ප්රතිපත්තිවලට ගරු කරමින් ඊට ආශිර්වාද දෙමින් දේශපාලන භූමියේ සක්රීය වී ඇති ආකාරය ද හොඳින් නිරීක්ෂණය කර ගත හැකිය. විශේෂයෙන් ගෝඨාභය රාජපක්ෂ නෙරපනු ලැබු තරුණයින්ගේ අරගලයට ද ඇයගේ ආශිර්වාදය නොමඳව ලබා දුන්නාය.
පසුගිය දින කීපයේ හිටපු ජනපතිනිය සහභාගී වූ සුවඳ හමුවලදී ද විමුක්තිගේ දේශපාලන ආගමනය ගැන ඇයගෙන් අසන අවස්ථාවල ඇය වෙනදා තරම් රළු ප්රතිචාර නොදක්වන බවද පැහැදිලිව පෙනෙන්නට තිබේ.
විමුක්ති පිළිබඳ සඳහන් නොකර තමන් තරුණයන් සූදානම් කරමින් සිටින බවයි ඇය එම අවස්ථාවල ප්රකාශ කරන්නේ.
එහි යටි අර්ථය වන්නේ මේ වන විටත් සිය පුත්රයාගේ වයසට හා ඔහුගේ පසුබිමට ගැළපෙන කණ්ඩායමක් ඇය විසින් සකස් කරමින් සිටින බවයි.
එනම් යම් නිශ්චිත මොහොතක විමුක්ති පැමිණෙනවා යන අරුත එහි පවතී.
