බංග්ලාදේශයේ වෙසෙන සුළුතර බෞද්ධ ජනතාව සහ අනෙකුත් ආගමික කණ්ඩායම් මේ වන විට දැඩි මර්දනයකට සහ ප්රචණ්ඩත්වයකට මුහුණ දී සිටින බව ශ්රී ලංකා බංග්ලාදේශ බෞද්ධ සහයෝගීතා පෙරමුණ අවධාරණය කර තිබෙනවා.
මෙම තත්ත්වය තුළ බංගලාදේශයේ බෞද්ධ උරුමය දැඩි අනතුරකට මුහුණ පා ඇති අතර බෞද්ධයින්ගේ අයිතිවාසිකම් සුරැකීම වෙනුවෙන් ලෝකවාසී බෞද්ධ ප්රජාව වහා මැදිහත් විය යුතු බව එම පෙරමුණ පෙන්වා දෙනවා.
මහනුවර ප්රදේශයේ ඊයේ (17) පැවැති මාධ්ය හමුවකදී එම පෙරමුණේ ප්රචාරක ලේකම්, ශාස්ත්රවේදී, ත්රිපිටක විශාරද, පූජ්ය නුවරඑළියේ කවිස්සර හිමියන් ප්රකාශ කළේ විශේෂයෙන්ම චිතගොං කඳුකරය (Chittagong Hill Tracts) ආශ්රිතව ජීවත් වන බෞද්ධ ආදිවාසීන්ගේ හෙට දවස බරපතළ අවදානමකට ලක්ව ඇති බවයි.
බංග්ලාදේශ බෞද්ධයන්ට එරෙහිව එල්ල වන මෙම ප්රහාරයන් අද ඊයේ ආරම්භ වූවක් නොවන බව පෙන්වා දෙන කවිස්සර හිමියෝ, 2012 වසරේදී අන්තවාදීන් විසින් බෞද්ධ විහාරස්ථාන 19ක් සහ බෞද්ධ නිවාස 100ක් පමණ විනාශ කළ අඳුරු මතකය මෙහිදී සිහිපත් කර තිබෙනවා. 2024 අගෝස්තු මාසයේදී එරට පැවති අවාමි ලීග රජය බිඳ වැටීමත් සමඟ ඇති වූ දේශපාලන අස්ථාවරත්වය, බෞද්ධ ජනතාවට එරෙහි ප්රචණ්ඩත්වය තවදුරටත් උත්සන්න වීමට හේතුවයි.
නිකුත් කර ඇති නවතම දත්ත වාර්තාවලට අනුව, 2024 සහ 2025 කාලසීමාව තුළ බංග්ලාදේශයේ සුළුතර ආගමිකයන්ට එරෙහිව ප්රචණ්ඩ ක්රියා 2,442ක් වාර්තා වී තිබෙනවා.
2025 වසරේ මුල් මාස තුන තුළ පමණක් බෞද්ධ විහාරස්ථාන 25කට ප්රහාර එල්ල වී ඇති බව ද වාර්තාවල දැක්වෙනවා.
දේශපාලන පළිගැනීම් මුවාවෙන් බෞද්ධ නිවාස කොල්ලකෑම සහ ගිනිබත් කිරීම අඛණ්ඩව සිදු වන්නකි. චිතගොං කඳුකරයේ බෞද්ධ ආදිවාසීන් සිව්දෙනෙකු මේ වන විටත් එවැනි පළිගැනීවල ගොදුරු බවට පත් වී තිබෙනවා.
මිනීමැරීම්, ස්ත්රී දූෂණ සහ බෞද්ධයන් සතු ඉඩම් බලහත්කාරයෙන් අත්පත් කරගැනීම් දිනෙන් දින ඉහළ යමින් පවතින බව පූජ්ය කවිස්සර හිමියෝ පවසා තිබෙනවා.
බෞද්ධයන් පමණක් නොව, බංග්ලාදේශයේ වෙසෙන හින්දු සහ ක්රිස්තියානි භක්තිකයන් ද මෙවැනිම තර්ජනයන්ට මුහුණ දෙන බව නිවේදනයේ සඳහන් වෙනවා. එම නිසා, සියලු සුළුතර ආගමිකයන්ගේ සිවිල් අයිතිවාසිකම් සුරැකීම වෙනුවෙන් පොදු එකඟතාවයකට පැමිණීම කාලීන අවශ්යතාවයක් බවයි උන්වහන්සේ පෙන්වා දෙන්නේ.
බංග්ලාදේශයේ බෞද්ධ උරුමය සහ බෞද්ධ ජනතාවගේ ජීවත්වීමේ අයිතිය සුරැකීම වෙනුවෙන් පෙරමුණ ගන්නා ලෙස ශ්රී ලංකාවේ මහා නායක හිමිවරුන්ගෙන්, සමස්ත මහා සංඝරත්නයෙන් සහ ලෝකවාසී බෞද්ධ ජනතාවගෙන් ශ්රී ලංකා බංග්ලාදේශ බෞද්ධ සහයෝගීතා පෙරමුණ ඉල්ලා තිබෙනවා.
බංග්ලාදේශය යනු ශ්රී ලංකාවේ බෞද්ධයන්ට ඓතිහාසික වශයෙන් ඉතා වැදගත් සන්ධිස්ථානයකි. අද එහි වෙසෙන සුළුතර බෞද්ධ ජනතාවගේ ජීවිත අනතුරේ වැටී ඇති මොහොතක, ඔවුන් වෙනුවෙන් හඬක් නැගීම අප සැමගේ වගකීමකි,” යැයි පූජ්ය නුවරඑළියේ කවිස්සර හිමියෝ සිය නිවේදනය අවසන් කරමින් සඳහන් කරනු ලබනවා.