අකුරේගොඩ ප්රදේශයේ දී වෙඩි ප්රහාරයකට ගොදුරු වී සාහසික ලෙස ඝාතනය වූ නීතිඥ බුද්ධික මල්ලවආරච්චි හා ඔහුගේ බිරිඳ සම්බන්ධයෙන් ජාතික ජන බලවේගයේ නීතිඥයින් දැඩි සංවේගය පළ කර තිබෙනවා.
නිවේදනයක් නිකුත් කරමින් ජාතික බලවේගයේ නීතිඥයින් සඳහන් කර ඇත්තේ නීතිඥ බුද්ධික මල්ලවආරච්චි මහතා සහ ඔහුගේ බිරිඳ පසුගිය පාලකයන් විසින් නිර්මාණය කරනු ලැබූ පාර රාජ්යය විසින් පෝෂණය කළ මැර කල්ලිවල ගොදුරු බවට පත් වූ බවයි.
විටින් විට මාධ්යවේදීන්, පොලිස් නිලධාරීන්, විනිසුරුවන් බිලිගත් මෙම කණ්ඩායම් මේ වන විට නීතිඥයින්ද බිලි ගනිමින් සිටින බව ඔවුන් පෙන්වා දෙනවා.
එබැවින් නැවත මෙවැනි සාහසික අපරාධ සිදුවීම වැළැක්වීම සඳහා යුක්තිය පසිඳලීම සහ ඒ වෙනුවෙන් සිදුකරන විමර්ශන මෙන්ම පූර්ව අපරාධ වැළැක්වීමේ ක්රමවේදවල දැති රෝද අන් සැමදාටත් වඩා වේගයෙන් ක්රියාත්මක කිරීම මේ රජයේ වගකීමක් බවයි ජාතික ජන බලවේගයේ නීතිඥයින් කණ්ඩායම පවසන්නේ.
එම නීතිඥයින් එකමුතුව නිකුත් කළ නිවේදනය මෙසේය.
මාධ්ය නිවේදනය
නීතිඥ බුද්ධික මල්ලවආරච්චි සහ ඔහුගේ බිරිඳගේ සහාසික ඝාතනය සම්බන්ධයෙනි*
සාහිසකයින්ගේ ප්රහාරයට ලක්ව 2026.02.13 දින අප අතරින් වියෝවූ බුද්ධික මල්ලවආරච්චි වෘත්තීය සහෝදරයා සහ ඔහුගේ බිරිඳගේ වියෝව පිලිබඳ ජාතික ජන බලවේගයේ නීතිඥයින් ලෙස අපි දැඩි සංවේගයට පත්වන්නෙමු.
පසුගිය පාලකයන් විසින් තම පටු පෞද්ගලික දේශපාලන අරමුණු ඉෂ්ඨ සිද්ධ කර ගැනීම සඳහා පාර රාජ්ය තුළ පෝෂණය කළ මැරවරයින් විසින්, පුරවැසියාගේ අයිතිවාසිකම් පිළිබඳ අධිකරණය තුළත් ඉන් පිටතත් හඬ නගන මෙන්ම ඊට කැපවෙන ප්රජාවක් වෙතට එල්ලවූ එම ප්රහාරය දැඩි පිළිකුලෙන් යුතුව හෙලා දකිමු.
දහවල් කාලය තුළ සාමාන්ය පුරවැසියන් ගැවසෙන වටපිටාවක ආයුධ සන්නද්ධව පැමිණ නිරායුධ පුරවැසියන් මරා දමන්නට දරුණු මැරවරයින්ට බලය හිමිවූ අඳුරු පරිච්ඡේදය හැකිතාක් ඉක්මනින් නිමා කිරීමේ අරමුණින් ක්රියාත්මක වන වර්තමාන රජය එකී අරමුණ වෙනුවෙන් ක්රියාත්මක වන වේගයටත් වඩා වැඩි වේගයකින් කටයුතු කළ යුතු බව මෙකී සිදුවීම පසක් කරයි.
එයට හේතුව මෙකී සිදුවීමේ වින්දිතයා වන්නේ නීතිඥවරයෙකු සහ ඔහුගේ බිරිඳ වීම හේතුවෙන් පමණක්ම නොව එය මෙරට පුරවැසියන් දෙදෙනෙකුට එල්ල වූ කුරිරු හා අමානුෂික ප්රහාරයක් නිසාවෙනි. එමෙන්ම ප්රශ්නය තම පරිදියට ඇතුළු නොවන තාක් විචිත්ර සංකල්ප ගෙනහැර දැක්වීම කළ හැකි වුවද ප්රශ්නය තම පරිදියට පැමිණි පසු එහි බරපතළකම සේම ජීවිතය පිළිබඳව තැති ගැන්ම සියලු දෙනා කෙරෙහි පවතී.
මන්ද පාර රාජ්යයේ ලේ පිපාසිතයින්ගේ ඉලක්කය විටක මාධ්යවේදියෙකි. විටක පොලිස් නිලධාරියකි. විටක විනිසුරුවරයකි. පසුගිය සිකුරාදා දිනයේදී පසක් කළේ එකී ඉලක්කය විටෙක නීතිඥවරක් වුවද විය හැකි බවයි.
එය හෙට කුමන වෘත්තියක් ඉලක්ක කර ගනු ඇත්ද යන්න උපකල්පනය කළ හැකි නොවේ. නමුත් නිතැතින්ම නීතිඥවරු ලෙස අප පසක් කරන්නේ රාජ්යයට එකී වගකීමෙන් මිදිය නොහැක්කා සේම යුක්තිය පසිඳලීමේ සහ ඒ වෙනුවෙන් සිදුකරන විමර්ශන මෙන්ම පූර්ව අපරාධ වැළැක්වීමේ ක්රමවේදවල දැති රෝද අන් සැමදාටත් වඩා වේගයෙන් ක්රියාත්මකවීම සිදුවිය යුතු බවයි.
සියලු පුරවැසියන්ගේ ගෞරවය හා යහපත් ජීවිතයක් වෙනුවෙන් පත් කරන ලද ජාතික ජන බලවේගයේ ආණ්ඩුව තම වගකීම ඉටුකරනු ඇතැයි අපි බලාපොරොත්තු වන්නෙමු. ශ්රී ලංකා පොලිසිය සහ රාජ්ය යාන්ත්රණය මෙකී ක්රියාව සම්බන්ධයෙන් නිසි උද්යෝගයෙන් යුතුව කඩිනමින් විමර්ශන කටයුතු අවසන් කොට අපරාධකරුවන් නීතිය හමුවට පමුණුවනු ඇතැයි අපි අපේක්ෂා කරමු.