සමාජ මාධ්ය වේදිකාවල වැරදි හා නොමඟ යවන තොරතුරු පැතිරීම පාලනය කිරීම සඳහා ප්රායෝගික පියවර සොයා බැලීමේ අරමුණින්, සෞඛ්ය හා ජනමාධ්ය අමාත්ය නලින්ද ජයතිස්ස සහ මෙටා නියෝජිතයින් අතර ඊයේ (18) විශේෂ සාකච්ඡාවක් පැවැත්විය.
සෞඛ්ය හා ජනමාධ්ය අමාත්යාංශයේදී පැවති මෙම සාකච්ඡාවේදී, ඩිජිටල් ආරක්ෂාව ශක්තිමත් කිරීම, අසත්ය හා නොමඟ යවන අන්තර්ගතයට එරෙහිව නිවැරදි තොරතුරු ප්රචාරය වැඩිදියුණු කිරීම සහ මාර්ගගත අන්තර්ගතයේ විශ්වසනීයත්වය උසස් කිරීම පිළිබඳ අවධානය යොමු කළ බව අමාත්යාංශය සඳහන් කළේය.
එමෙන්ම, පරිශීලකයින් අතර වගකිවයුතු තොරතුරු භාවිතය සහ බෙදාගැනීම ප්රවර්ධනය කිරීම පිළිබඳව ද සාකච්ඡා කෙරිණි.
තරුණයින් අතර වැඩිවෙමින් පවතින නීතිවිරෝධී මත්ද්රව්ය භාවිතය සම්බන්ධ ගැටලුවට විසඳුම් සෙවීම සඳහා ශ්රී ලංකා රජය හා මෙටා අතර සහයෝගීතාවය තවදුරටත් වර්ධනය කිරීම පිළිබඳව ද මෙහිදී අවධානය යොමු විය. මෙම උත්සාහය, මත්ද්රව්ය ජාවාරමට එරෙහිව සටන් කිරීම සහ තරුණයින් හා පාසල් සිසුන් ආරක්ෂා කිරීම අරමුණු කරගත් “රටම එකට” ජාතික වැඩසටහන සමඟ සම්බන්ධ වේ.
“රටම එකට” වැඩසටහනට සහාය දීමට මෙටා නියෝජිතයින් කැමැත්ත පළ කළ අතර, වැළැක්වීම, දැනුවත් කිරීම සහ නීති ක්රියාත්මක කිරීම ඇතුළත් සම්බන්ධීකරණ, බහු-ආංශික ප්රවේශයක් අවශ්ය බවද අවධාරණය කෙරිණි.
මෙම සාකච්ඡාව සඳහා මෙටා සමාගම නියෝජනය කරමින් මධ්යම ආසියාව, මොන්ගෝලියාව, ශ්රී ලංකාව සහ මාලදිවයින යන අංශවල රාජ්ය ප්රතිපත්ති ප්රධානී, සෙනුර අබේවර්ධන, දකුණු ආසියාව සඳහා මහජන ප්රතිපත්ති සහකාර කළමනාකරු ටෙහාරා පුංචිහේවා, ආසියා පැසිෆික් ආරක්ෂක ප්රතිපත්ති ප්රධානී ප්රියංකා භල්ලා, “රටම එකට” ජාතික මෙහෙයුම් කමිටුවේ සහ Rebuilding Sri Lanka ජනාධිපති කාර්ය සාධක බළකායේ සාමාජිකා මන්දනා ඉස්මයිල් අබේවික්රම යන මහත්ම මහත්මීන් එක්ව සිටියහ.