හමාස් සංවිධානය ඊශ්‍රායලයට එල්ල කළ ප්‍රහාරයෙන් පසු පළමු වරට ඔවුන්ගේ ප්‍රාණ ඇපකරුවෙකුගේ වීඩියෝවක් නිකුත් කර තිබෙනවා.
එය ඔවුන්ගේ Telegram හි පළ කරනු ලැබූ අතර එහි හමාස් වෙතින් වෛද්‍ය ප්‍රතිකාර ලබන බව කියන තරුණියක් පෙන්වනු ලබයි.
වීඩියෝ පටයේ, තරුණියගේ බිඳී ගිය අතට වෛද්‍ය ප්‍රතිකාර ලබා දෙන ආකාරය දැකගත හැකියි.
“හායි, මම මියා ෂෙම්, Shoham හි ජීවත් වුණේ. අවුරුදු 21 යි. දැනට මම ගාසා වල ඉන්නේ. මම සෙනසුරාදා උදෑසන Sderot වල උත්සවයකට සහභාගී වෙලා හිටියා. ප්‍රහාරයෙන් මගේ අතට බරපතළ තුවාල වුණා. ගාසා හි රෝහලේදී මගේ අතට පැය තුනක සැත්කමක් කළා.එයාලා මාව බලාගන්නවා, බෙහෙත් දෙනවා. ඔක්කොම හරි.මා ඉල්ලා සිටින්නේ හැකි ඉක්මණින් මා නිවසට ගෙන්වා දෙන ලෙසයි. හැකි ඉක්මණින් මාව මෙතනින් ඉවත් කරගන්න”
හමාස් හි ටෙලිග්‍රාම් නාලිකාවේ වීඩියෝව නිකුත් කරනු ලැබුවේ”අල්-අක්සා සටනේ පළමු දිනයේ අල්ලා ගන්නා ලද ගාසාවේ කාන්තා සිරකාරියකට අල්-කසාම් බළකායේ මුජාහිදීන් වෛද්‍ය ප්‍රතිකාර ලබා දෙයි” යන ශීර්ෂ පාඨය සමඟින්.
ඊශ්‍රායල ආරක්ෂක හමුදා, 21 හැවිරිදි ප්‍රාණ ඇපකාරියගේ වීඩියෝව විස්තර කළේ “මානුෂීය සංවිධානයක් ලෙස පෙනී සිටීමට හමාස් දරන දුප්පත් උත්සාහයක්” ලෙසයි.
හමාස් සංවිධානය විසින් මියාගේ පැහැර ගැනීම සම්බන්ධයෙන් ඇයගේ පවුලේ අයට දැනුම් දී ඇති බව ද වාර්තා වෙනවා.
