ශ්‍රී ලංකා නිදහස් පක්ෂ මූලස්ථානයේ තිබූ ලිපිගොනු කිහිපයක් අතුරුදන්වීම සම්බන්ධයෙන් පොලිසිය විමර්ශනයක් ආරම්භ කිරීමත් ඒ අනුව ශ්‍රී ලංකා නිදහස් පක්ෂ මූලස්ථානයට කිසිවකුටත් ඇතුළු වීම තාවකාලිකව තහනම් කිරීමත් සමඟ මූලස්ථානය ඉදිරිපට නොසන්සුන්කාරී තත්ත්වයක් උද්ගත වූ බව වාර්තා වී තිබේ.
එම ස්ථානයට පැමිණි සභාපති මෛත්‍රීපාල සිරිසේන මහතාට හිතවාදී පිරිසක් මූලස්ථානයට ඇතුළුවීම තහනම් කිරීමේ නියෝගයට එරෙහිව විරෝධතාවයක් පවත්වන ලදී.
එම ස්ථානයට හිටපු මහලේකම් පක්ෂයෙන් නෙරපා හරින ලද දයාසිරි ජය්සේකර මහතා ද පැමිණි සිටි අතර ශ්‍රී ලංකා නිදහස් පක්ෂයේ වත්මන් භූමිකාව ආණ්ඩු විරෝධී සහ විපක්ෂයේ භූමිකාව බවත් ඊට එරෙහි කණ්ඩායමක් ඉවත්ව ගොස් සියල්ල අවුල් කිරීමට කටයුතු කරමින් සිටින බව පවසයි.
සභාපතිවරයාට නිකුත් කර ඇති තහනම් නියෝගය සමඟ ශ්‍රී ලංකා නිදහස් පක්ෂය මේ වන විට මැයි දිනය සැමරීමට නොහැකි පක්ෂයක් බවට පත් කර ඇති බව ද ඔහු පවසයි.
ශ්‍රී ලංකා නිදහස් පක්ෂයේ වැඩබලන මහලේකම් දුෂ්මන්ත මිත්‍රපාල ඊයේ (05) දිනයේ මරදාන පොලීසියට ඒ පිළිබඳව පැමිණිල්ලක් ඉදිරිපත් කර ඇතැයි පොලිසිය සඳහන් කළේ ය.
ඒ අනුව ශ්‍රී ලංකා නිදහස් පක්ෂ මූලස්ථානයට කිසිවකුටත් ඇතුළුවීම තාවකාලිකව තහනම් කර තිබේ.
පොලිස් මාධ්‍ය ඒකකය පවසන්නේ, මේ සම්බන්ධයෙන් මූලික පරීක්ෂණ අවසන් වනතුරු ශ්‍රී ලංකා නිදහස් පක්ෂ කාර්යාලයට ඇතුළුවීම තහනම් කර ඇති බවයි.
ශ්‍රීලනිප මුලස්ථානයට විශේෂ ආරක්ෂාවක් යොදවා ඇති බවද වාර්තා වේ.
