රටට ඇතුලු වෙන සංචාරකයින් සඳහා වීසා ලබා දීමේ ක්‍රියාවලිය ඉන්දියානු සමාගමක් වෙත ලබා දීමෙන් දළ වශයෙන් රටට කෝටි 1000 ක පමණ ආදායමක් අහිමි වී ඇති බව ජාතික ජන බලවේගයේ විධායක සභික වසන්ත සමරසිංහ මහතා පවසනවා.
වසරකට මෙරටට පැමිණෙන සංචාරකයින් ප්‍රමාණයෙන් ගණනය කර බැලූවිට රටේ සුභ සාධක ක්‍රියාවලි සඳහා යෙදවිය හැකි විශාල ධනස්කන්ධයක් විදෙස් සමාගමක් විසින් රැගෙන යන බව ඔහු පෙන්වා දෙනවා.
ගියවසරේ මෙරටට පැමිණි ලක්ෂ 20 ක සංචාරකයින් ප්‍රමාණය අනුව සැසඳමේදී එය කෝටි 1000ක අලාභයක් බවයි ඔහු පවසන්නේ.
එම ජාවාරම පිටුපස අනිවාර්යයෙන් ප්‍රබල ඇමතිවරු පිරිසක් සිටින බව ඔහු සඳහන් කළා.
ලෝකයේ සෑම රටකම එම රටවලට ඇතුළුවන පුද්ගලයින් සඳහා වීසා ලබා දෙන්නේ එම රටවල ආගමන විගමන ක්‍රියාවලිය හරහා බවත් අපේ රටේ එම ක්‍රියාවලිය ඉන්දියානු සමාගමකට ලබා දීම පිටුපස දැවැන්ත වංචාවක් සිදුව ඇති බවයි ඔහු පැවසුවේ.
