ඉන්දීය ප්‍රිමියර් ලීග් තරඟාවලියේ අවසන් මහා තරඟයෙන් පසු ප්‍රවීන නිළි ජූහි චව්ලාගේ ඉන්ස්ටග්‍රෑම් ගිණුම ජයග්‍රාහී උණුසුමින් පිරී ගිය අතර කලාතුරකින් දක්නට ලැබෙන ඇගේ දරුවන් දෙදෙනාද එම ඡායාරූපවල දක්නට ලැබුණා.
පසුගිය ඉරිදා පැවති IPL 2024 අවසන් මහා තරගය නැරඹීමට ජූහි, ඇගේ සැමියා වන කොල්කටා නයිට් රයිඩර්ස් කණ්ඩායමේ සම හිමිකරු වන ව්‍යාපාරික ජේ මේතා මෙන්ම දියණිය Jahnavi Mehta සහ පුති Arjun Mehta ද එක්ව සිටියා.
ශ්‍රේයස් අයියර්ගේ නායකත්වයෙන් යුත් කණ්ඩායමේ විශිෂ්ට ජයග්‍රහණයෙන් පසු ජූහි ඇගේ ඉන්ස්ටග්‍රෑම් පිටුවේ ඔවුන් එයින් අමන්දානන්දයට පත් වූ ඡායාරූප ගණනාවක් බෙදාගෙන තිබෙනවා.
විශේෂයෙන් ඇගේ දියණිය ජානවි සහ පුතු අර්ජුන ඉන්දීය මාධ්‍යවල සුලබව දක්නට ලැබෙන තරු දරුවන් දෙදෙනෙක් නොවන නිසා හැමෝටම එය සුවිශේෂී අත්දැකීමක් වුණා.
ජුහි චව්ලා, ජේ මේතා සහ ෂාරුක් ඛාන් IPL 2024 ජයග්‍රාහී කොල්කටා නයිට් රයිඩර්ස් කණ්ඩායමේ සම හිමිකරුවන් වෙනවා.ව්‍යාපාරික බැඳීමට එහා ගොස් ජූහි යනු සිනමාවේ ෂාරුක් ඛාන්ගේ ළඟම මිතුරියයි.
පසුගිය වසරේ මැයි මාසයේදී, ජූහිගේ දියණිය Jahnavi කොලොම්බියාවෙන් උපාධිය ලබා ගත් ඡායාරූපයක් ජූහි X හි පළ කළ විට ෂාරුක් ඛාන් ඔහුගේ මිලියන ගණනක් වන රසිකයන් අතරේ එය බෙදාගෙන තිබුණේ ” ඉතා විශිෂ්ටයි. නැවත පැමිණ ඇය සමඟ මෙය සමරන තෙක් ඉවසුමක් නැහැ. අතිශය ආඩම්බරයි. ඔබට ආදරෙයි Jaanz.” යනුවෙන් පවසමින්. ෂාරුක් ජුහිගේ දුවට කෙතරම් ආදරය ද යන්න ඒ තුළ ගැබ්ව තිබුණා. කොල්කටා නයිට් රයිඩර්ස් ජයග්‍රහණය සමඟ ෂාරුක්ගේ දරුවන් සහ ජූහිගේ දරුවන් එක්ව එම ජයග්‍රහණය සමරන ආකාරය ඉන්දීය මාධ්‍යවල ප්‍රමුඛ පුවතක් වී තිබුණා.
