තමන් දිලිත් ජයවීරගේ නායකත්වයෙන් යුතු මව්බිම ජනතා පක්ෂයේ සියළු තනතුරුවලින් ඉවත් වීමට තීරණය කළේ, එම පක්ෂය, විමල් වීරවංශ, උදය ගම්මන්පිළ වැනි ජාතිවාදී දේශපාලන පක්ෂ නායකයන් සමග අත්වැල් බැද ගැනීමට ගත් තීරණය හේතුවෙන් බව ආචාර්ය සරත් අමුණුගම මහතා පවසනවා.
තමන් කිසිකලක ජාතිවාදී දේශපාලනයට පක්ෂ නොවූ බව පවසා තිබෙන අමුණුගම මහතා, මව්බිම ජනතා පක්ෂය, මෙරට තාරුණ්‍යය ආකර්ශනය කර ගනිමින් නව දේශපාලන ගමනක් යනු ඇතැයි තමන් අපේක්ෂා කළ බව මාධ්‍ය වෙත අදහස් දක්වමින් පවසා තිබෙනවා.
එබැවින් තමන් අපේක්ෂා කළ මාර්ගයෙන් පිට ගොස්, ජාතිවාදීන් සමග අත්වැල් බැද ගැනීමට පක්ෂය ගත් තීරණයත් සමග තමන් පක්ෂයේ සියලු තනතුරුවලින් ඉවත් වීමට තීරණය කළ බව ආචාර්ය සරත් අමුණුගම මහතා වැඩිදුරටත් සඳහන් කර තිබෙනවා.
පසු ගිය දා විමල් වීරවංශ, උදය ගම්මන්පිල, චන්න ජයසුමන සමඟ මව්බිම ජනතා පක්ෂයේ නායක දිලිත් ජයවීර එක්ව සර්ව ජන බලය නම් සන්ධානයක් පිහිටුවනු ලැබූ අතර ඒ සමඟ එම පක්ෂයේ තනතුරු වලින් ඉල්ලා අස් වන බව සඳහන් කරමින් ආචාර්ය අමුණුගම මහතා දිලිත් ජයවීර මහතා වෙත ඉල්ලා අස්වීමේ ලිපියක් යොමු කළ බව වාර්තා වුණා.
