මියන්මාරයේ මියාවඩි ප්රදේශයේ පරිගණක අපරාධකරුවන් විසින් බලහත්කාරයෙන් රඳවාගෙන සිටින ශ්රී ලාංකික තරුණ තරුණියන් 49 දෙනා බේරාගැනීම සඳහා පිටත්ව ගිය පාර්ලිමේන්තුවේ විපක්ෂයේ මන්ත්රීවරුන් මියන්මාරයේ යැංගුම් නුවර සිට කිලෝමීටර් 500ක් පමණ දුරින් Nay Pyi Taw නෙපිටෝ නුවර පිහිටා ඇති එරට විදේශ අමාත්යාංශයේ දී සාකච්ඡා ආරම්භ කර ඇති බව වාර්තා වෙනවා.
නීතිඥ වසන්න යාපාබණ්ඩාර, ජේ.සී. අලවතුවල, සුජිත් සන්ජය පෙරේරා යන මන්ත්රීවරුන් ත්රෛයි නායක භික්ෂුන් වහන්සේලාගේ සන්දේශයක් ද රැගෙන පසු ගිය දා දිවයිනෙන් පිටත්ව ගියා.
මෙම සාකච්ඡා සඳහා මියන්මාර අග්රාමාත්යවරයා වෙනුවෙන් එරට විදේශ නියෝජ්ය අමාත්ය H.E.U. Than Swe මැතිතුමා ඇතුළු රාජතාන්ත්රික නිලධාරීන් කණ්ඩායමක් සහභාගි වූ බව වාර්තා වෙනවා.
එහිදී ශ්රී ලංකා පාර්ලිමේන්තුවේ විපක්ෂ නායක සජිත් ප්රේමදාස මහතා විසින් විශේෂයෙන් මේ පිරිස බේරාදීමට අදාල රාජතාන්ත්රික කටයුතු කර දෙන මෙන් කරන ලද ඉල්ලීම ඇතුළත් සංදේශයක්ද බලධාරීන් වෙත භාර දී තිබෙනවා.
එම සාකච්ඡාවෙන් අනතුරුව නැවත යැංගුම් නුවර පිහිටි Shwe Dagon Pagoda මියන්මාර පන්සලේ වැඩවසන මියන්මාර ප්රධාන සංඝනායක ස්වාමීන් වහන්සේ වන Thanlyin Min Kyaung Sayardaw නායක ස්වාමීන් වහන්සේ සමඟ ද මෙම දරුවන් බේරා ගැනීම පිළිබඳව සාකච්ඡා ආරම්භ කළ බව සඳහන්.
එම ස්වාමීන්වහන්සේ වෙත ශ්රී ලංකාවේ ත්රෛ නිකායික මහානායක ස්වාමිපාදයන් වහන්සේලාගේ අත්සනින් යුතු, මෙම දරුවන් බේරා ගැනීම සඳහා වන විශේෂ ඉල්ලීමක් ඇතුළත් සංදේශයක් බාරදීම ද සවස 07.30 ට යැංගුම් විහාරස්ථානයේදී සිදු කෙරුණා.
