අරගලය සමඟ පසුබැස සිටි දූෂිත රස්තියාදුකාර දේශපාලකයන් යළි හිස ඔසවන්නට පටන් ගෙන ඇති බව පවසන ජාතික ජන බලවේගයේ නායක අනුර කුමාර දිසානායක මහතා අරගලයේ සැබෑ අපේක්ෂාවන් ඉටු කිරීමට නම් ජනතා නැගිටීමෙහි සැබෑ අරමුණ රකින රජයක් අවශ්ය බව පවසනවා.
2022 ජනතා නැගිටීමේ සැබෑ අභිලාෂයන් මුදුන් පමුණුවා ගත හැකි එකම දේශපාලන බලවේගය සහ රජය ජාතික ජන බලවේගය බව කුරුණෑගල පැවති NPP තරුණ රැළියට එක්වෙමින් ඔහු සඳහන් කළා.
දේශපාලනඥයන් අරගලයෙන් පාඩමක් ඉගෙන ගෙන නැති බවත් ඒ වෙනුවට කුඩුකාරයන්ගේ නැගිටීමක් බව පවසමින් ජනතා නැගිටීම හෑල්ලූවට ලක් කරන බවයි ඔහු එහි දී පවසා සිටියේ.
කිසිදු දේශපාලන බලවේගයකට පක්ෂපාතී නොවුණු පොදු අභිලාෂයන් වෙනුවෙන් ජනතාව විශේෂයෙන්ම තරුණයන් පාරට බැස්ස බවත් යහපත් දේශපාලන තත්ත්වයක් සඳහා ඔවුන්ට අපේක්ෂාවක් පැවති බව ඔහු පැවසුවා.
“මහජනයා බලාපොරොත්තු වුණේ වංචාවෙන් දූෂණයෙන් තොර විනයගරුක නීත්යානුකූල රටක්. ඔවුන් පාරට බැස්සෙ පොදු සමාජ අරමුණක් වෙනුවෙන්. නමුත් ඒක පාලකයාට තේරෙන්නෙ නැහැ. එය හෑල්ලූවට ලක්කරලා අරගලය කළේ කුඩුකාරයෝ, ගණිකාවෝ කියනවා. මේ පාලකයෝ එවැනි දැවැන්ත නැගිටීමකින් පවා කවදාවත් පාඩමක් ඉගෙන ගත්තේ නැහැ”
අරගලයෙන් පසුව ද බලය පාවිච්චි කරමින් ජනතාව මර්ධනය කිරීමට හා රාජ්ය දේපළ විකිණීමට පටන් ගෙන ඇති අතර අරගලයෙන් පසුවද දේශපාලනඥයන් ගමන් කරන්නේ පරණ පාරේම බව ඔහු වැඩි දුරටත් පවසා සිටියා.
