එක්සත් ජනපදයේ සහ කැරිබියන් දූපත්හි පැවැත්වෙන විස්සයි20 ලෝක කුසලාන තරගාවලියේදී ශ්‍රී ලංකා පිල ඊයේ (09) දිනයේ දීත් අඛණ්ඩව අසාර්ථකත්වයට පත් වූයේ බංග්ලාදේශය හමුවේ කඩුලු 2ක පරාජයක් ලබා ගනිමිනි.
අත්‍යවශ්‍යයෙන්ම ‘ජයගත යුතු’ තරගයකින් එසේ පරාජයට පත් වීමත් සමඟ ශ්‍රී ලංකා ක්‍රිකට් අභ්‍යන්තරයේ ඇති ගැටලු විසඳීමට පත් කළ කැබිනට් අනුකමිටු සභාපතිවරයා ද වන විදේශ අමාත්‍ය අලි සබ්‍රි X ඔස්සේ අදහස් දක්වමින් ශ්‍රී ලංකා ක්‍රිකට් සඳහා දැඩි ප්‍රතිසංස්කරණ අවශ්‍ය බව සඳහන් කර තිබෙනවා.
“ශ්‍රී ලංකා ක්‍රිකට් හි වත්මන් තත්ත්වය” යන මාතෘකාව යටතේ අමාත්‍යවරයා ප්‍රකාශ කළේ “2023 ICC ලෝක කුසලානයේ සහ ICC T20 හි මෑත කාලීන බලාපොරොත්තු සුන්වීම් හුදකලා සිදුවීම් නොවන බවයි.
ඒවා අපගේ ක්‍රිකට් යටිතල ව්‍යුහය තුළ ගැඹුරට මුල් බැස ඇති ගැටලු පිළිබඳ පැහැදිලි දර්ශකයි.මේ ප්‍රශ්න තාවකාලික විසඳුම්වලින් විසඳන්න බැහැ. අපගේ ක්‍රිකට් පුද්ගලික ව්‍යාපාරයක් බවට පත් කළ අයගේ පාලනයෙන් නිදහස් කරන නිර්භීත, වෘත්තීය ප්‍රවේශයක් අවශ්‍ය වෙනවා”
රටේ ක්‍රිකට් ක්‍රීඩාවේ තත්ත්වය පිළිබඳව සොයා බැලීම සඳහා පත් කළ කැබිනට් අනුකමිටුවේ සභාපතිවරයා ලෙස ප්‍රතිසංස්කරණ සඳහා ඇති දැඩි අවශ්‍යතාවය පිළිබඳව තමාට සහතික විය හැකි බව අමාත්‍යවරයා වැඩිදුරටත් සඳහන් කර තිබෙනවා.
“අපගේ වාර්තාව පැහැදිලි ඉදිරි මාවතක් දක්වා ඇති අතර, අපි දැන් නව නීති මගින් මෙම තීරණාත්මක වෙනස්කම් ක්‍රියාත්මක කිරීමේ අද්දර සිටිමු. මෙය ශ්‍රී ලංකා ක්‍රිකට් ක්‍රීඩාවේ තීරණාත්මක අවස්ථාවක්”
“අපි මෙම අවස්ථාව ප්‍රයෝජනයට ගෙන ශ්‍රී ලංකා ක්‍රිකට් සඳහා නව ක්‍රීඩා නීතියක් සහ ව්‍යවස්ථාවක් සමඟ ප්‍රතිසංස්කරණ ක්‍රියාත්මක කළ යුතුයි.ශ්‍රී ලංකාවේ ක්‍රිකට් යනු ක්‍රීඩාවක් හෝ ව්‍යාපාරයක් පමණක් නෙවෙයි. එය අපේ ජාතික ආත්මයේ පිළිබිඹුවක්. අපගේ සාර්ථකත්වය මනිනු ලැබිය යුත්තේ මුල්‍ය ප්‍රමිතික වලින් නොව ක්‍ෂේත්‍රයේ අප ලබන ජයග්‍රහණ සහ අපගේ ජනතාව තුළ අප තුළ ඇති කරන බලාපොරොත්තුව මතයි. දැනට, අපගේ කාර්ය සාධනය පිළිගත නොහැකි අතර, වෙනසක් සඳහා කාලය දැන් පැමිණ තිබෙනවා”ඇමති සබ්‍රි අවධාරණය කර තිබෙනවා.
