ෆ්ලොරිඩාවේ ලෝඩ් හිල් වෙත ඇද හැලෙන අධික වර්ෂාවෙන් ශ්‍රී ලංකා වේලාවෙන් හෙට (12) උදෑසන 5.00 ට ආරම්භ වන ශ්‍රී ලංකාව හා නේපාලය අතර විස්සයි20 තරගයට බාධා විය හැකි බව ක්‍රීඩා විචාරකයින් පවසනවා.
ෆ්ලොරීඩා හි කාලගුණික වාර්තා අද රාත්‍රිය පුරාවට ගිගුරුම් සහිත වැසි පුරෝකථනය කර තිබීම ඊට හේතුවයි.
තරගය සඳහා ශ්‍රී ලංකාවේ අවසන් සූදානමට ද වැස්සෙන් බාධා එල්ල වූ බව වාර්තා වෙනවා. සඳුදා ඔවුන්ගේ පුහුණු සැසියට වර්ෂාවෙන් දැඩි බාධා එල්ල වුණා.
බංගලාදේශයට එරෙහිව කඩුලු 2 කින් සහ දකුණු අප්‍රිකාවට එරෙහිව කඩුලු 6 කින් ආරම්භක කණ්ඩායම් තරග දෙකම පරාජයට පත්වීමෙන් ශ්‍රී ලංකාව පීඩනයට ලක්ව සිටින අතර නේපාලයට එරෙහි තරගය ජයග්‍රහණය කිරීම ශ්‍රී ලංකා කණ්ඩායමේ අධිෂ්ඨානය වන නමුත් නෙදර්ලන්තයට එරෙහිව ලෝක කුසලානයේ පළමු තරගයෙන් පරාජය වී සිටින නේපාලයට ද මෙම තරගය ජයග්‍රහණය තීරණාත්මක බවයි විචාරකයින් පෙන්වා දෙන්නේ.
මෙම පරාජයන් හමුවේ ශ්‍රී ලංකාව D කාණ්ඩයේ පහළම තැනට පත් කර ඇති අතර සුපිරි අට වටයට පිවිසීමට අවස්ථාව ලබා ගැනීමට නම් ඉතිරි තරග දෙකම ජයග්‍රහණය කිරීමේ අවශ්‍යතාව පවතී.
