මහනුවර වෙලම්බඩ ප්‍රදේශයේ ළමා නිවාසයකදී එහි පාලිකාවගේ අනුදැනුම මත තමන් ලිංගික අපයෝජනයට ලක්වූ බව කියන දැරියක් මඩාටුගම පොලිසියට කරන ලද පැමිණිල්ල සැක සහිත බව පොලිසිය පවසනවා.
වයස අවුරුදු 17 ක පසුවන දැරිය සිදු කරන ප්‍රකාශය අසත්‍ය බව සැක කරන පොලිසිය පවසන්නේ ඇය අවුරුදු 23ක විවාහක පුද්ගලයෙකු සමඟ ප්‍රේම සම්බන්ධයක් ඇතිකර ගෙන ඔහු සමඟ පැනගොස් කොළඹ ප්‍රදේශයේ රැඳී සිට ඇති බව අනාවරණය කරගත් බවයි.
එමෙන්ම මෙම දැරිය යහපත් මානසික තත්ත්වයක පසු නොවන බවත් මෙම දැරිය ළමා නිවාසයේ රැඳී සිටියදී අනෙකුත් රැදවියන්ට හා පාලිකාවන්ට පහරදීම් සිදුකර ඇති බවටත් ඔවුන්ගේ ඇඳුම් ඉරා දමමින් හැසිරී ඇති බවට කරුණු අනාවරණය කරගෙන ඇති බවයි පොලිසිය පවසන්නේ.
ඇය එම ස්ථානයේ දේපොළවලටද හානි සිදුකර තිබෙන බව ළමා නිවාස ලිපිගොනු පරික්ෂාවේදී හෙළිවී තිබෙනවා.
මෙම දැරිය මානසික රෝගී තත්ත්වයකට ප්‍රතිකාර ගෙන තිබෙන අතර ඇය කිහිප අවස්ථාවක් ළමා නිවාසයෙන් පැනයාමට උත්සාහකර ඇති බව ද පොලිසිය පවසනවා.
නිසි භාරකාරත්වයක් නොමැතිවීම මත දඹුල්ල අධිකරණය මඟින් පසුගිය පෙබරවාරි මස 24 වැනි දින ඇයව අදාළ ළමා නිවාසයට යොමු කර ඇති බව වැඩිදුරටත් සඳහන් වී තිබෙනවා.
