Streptococcal Toxic Shock Syndrome (STSS) ලෙස හඳුන්වන මාරාන්තික මස් දිය කර දමන බැක්ටීරියාව ජපානයේ භයානක වැඩිවීමක් පෙන්නුම් කරමින් පැතිර යන බව විදෙස් මාධ්‍ය වාර්තා කර තිබෙනවා.
මෙම භයානක රෝගය ආසාදනය වී පැය 48ක් ඇතුළත මාරාන්තික විය හැකි බව වෛද්‍යවරු පෙන්වා දෙනවා.
ජපානයේ බෝවන රෝග පිළිබඳ ජාතික ආයතනයේ දත්ත වලට අනුව, මේ වසරේ දැනටමත් රෝගීන් 1,000 කට ආසන්න සංඛ්‍යාවක් වාර්තා කර ඇති අතර එය පසුගිය වසරේ වාර්තා වූ මුළු සංඛ්‍යාව ද ඉක්මවා ගොසිනි.
STSS යනු A කාණ්ඩයේ Streptococcus (GAS) බැක්ටීරියාව නිසා ඇතිවන දරුණු ආසාදනයකි.
බැක්ටීරියා ශරීරයට ඇතුළු වී දැඩි වේදනාකාරී විෂ ද්‍රව්‍ය නිපදවන අතර ඉක්මනින් රුධිරයට හා අවයව වලට ඇතුල් වී කෙටි කාලයක් තුළ බහු අවයව අක්‍රීය කර දමයි.
ජපානයේ සෞඛ්‍ය අමාත්‍යාංශය විසින් වාර්තා කර ඇත්තේ ජූනි 2 වන විට (STSS) රෝගීන් 977ක් වාර්තා කර ඇති අතර මරණ අනුපාතය 30% දක්වා ඉහළ ගොස් ඇති බවයි.
පවතින නවතම සංඛ්‍යාලේඛනවලට අනුව ජනවාරි සිට මාර්තු දක්වා කාලය තුළ පුද්ගලයින් 77 ක් පමණ ආසාදනයෙන් මිය ගොස් තිබෙනවා.
ජපානයේ බෝවන රෝග පිළිබඳ ජාතික ආයතනයේ දත්ත අනුව පසුගිය වසරේ STSS හේතුවෙන් මරණ 97 ක් වාර්තා කර තිබුණා.
රෝගීන් මුලදී උණ, මාංශ පේශි වේදනාව සහ වමනය වැනි රෝගවලින් පෙළෙන නමුත් ශරීරය කම්පනයට පත් වන විට අඩු රුධිර පීඩනය, ඉදිමීම සහ බහු අවයව අක්‍රීය වීම සමඟ ඉක්මණින් මරණයට පත් කරන අවධානමක් පෙන්නුම් කරයි.
රෝග පාලනය සහ වැළැක්වීම සඳහා එක්සත් ජනපද මධ්‍යස්ථාන (CDC) අනුව ප්‍රතිකාර කළත් STSS මාරාන්තික විය හැකියි. STSS සහිත පුද්ගලයින් 10 දෙනෙකුගෙන්, පුද්ගලයන් තිදෙනෙකු ආසාදනයෙන් මිය යනු ඇති බව ඔවුන් සඳහන් කරනවා.
Streptococcus බැක්ටීරියාව ප්‍රධාන වශයෙන් ළමුන් තුළ උණ සහ උගුර ආසාදන ඇති කරනු ලබනවා.
එමෙන්ම අත් පා අහිමි වීමට හේතු විය හැකි “මස් කෑම” (necrotizing fasciitis) ද ඇති කළ හැකියි.
2022 දෙසැම්බරයේ දී, ලෝක සෞඛ්‍ය සංවිධානයට වාර්තා කළේ යුරෝපීය රටවල් පහක ආක්‍රමණශීලී කාණ්ඩයේ A streptococcus (iGAS) වැඩි වීමක් දක්නට ලැබෙන බවයි.
ඕස්ට්‍රේලියාවේ ද මෑත දිනවලදී රෝගයේ වැඩිවීමක් දක්නට ලැබෙන අතර 74 හැවිරිදි ශ්‍රී ලාංකික කාන්තාවක් ද එයට ගොදුරු වී සිහිසුන්ව ප්‍රතිකාර ලබන බව එරට මාධ්‍ය වාර්තා කළා.
පෙර ලිපිය –
දුව බලන්න ඕස්ට්‍රේලියාවට ගිය අම්මාට සම දියවෙන දුර්ලභ රෝගයක්
