දකුණු කොරියාවේ ලිතියම් බැටරි නිෂ්පාදන කර්මාන්ත ශාලාවක ඇති වූ ගින්නෙන් මියගිය සහ තුවාල ලැබූවන් අතර කිසිදු ශ්‍රී ලාංකිකයෙකු නොමැති බව ශ්‍රී ලංකා විදේශ කටයුතු අමාත්‍යංශය තහවුරු කර තිබෙනවා.
සෝල් අගනුවර, හ්වාසොං නගරයේ ඇරිසෙල් කම්හලේ ලිතියම් බැටරි කිහිපයක් පුපුරා යාම හේතුවෙන් එම ගින්න හටගත් බව විදෙස් මාධ්‍ය වාර්තා කළා.
එම අවස්ථාවේ කර්මාන්තශාලාවේ සේවකයන් 100 දෙනෙකු පමණ සේවය කරමින් සිට තිබෙන අතර ගින්නෙන් පුද්ගලයින් 22නෙක් ජීවිතක්ෂයට පත්ව තිබෙනවා.
මියගිය පිරිස අතර චීන ජාතිකයින් 18ක්, ලාඕසියානු ජාතිකයින් දෙදෙනෙක් සහ දකුණු කොරියානු කම්කරුවන් දෙදෙනෙක්ද සිටින බව විදෙස් මාධ්‍ය වාර්තා සඳහන් කළා.
ගින්නෙන් තවත් පුද්ගලයන් තිදෙනෙකු බරපතල තුවාල ලබා රෝහල් ගත කර ඇති බවද එම වාර්තාවල සඳහන්.
දකුණු කොරියාව ලිතියම් බැටරි නිෂ්පාදනයේ ප්‍රමුඛයා වන අතර ඒවා විද්‍යුත් වාහනවල සිට ලැප්ටොප් පරිගණක දක්වා බොහෝ අයිතමවල භාවිත වන්නකි.
