ශ්‍රී ලංකාව මෙරට ද්වීපාර්ශික ණය හිමියන්ගේ පැරීසියේ පිහිටි නිල කමිටුව සමග අමෙරිකානු ඩොලර් බිලියන 5.8ක ණය ප්‍රතිව්‍යුහගතකරණ අවසන් එකඟතාවට අද (26) එළඹී තිබෙනවා.
ජනාධිපති මාධ්‍ය අංශය නිවේදනය නිකුත් කරමින් සඳහන් කළේ මීට සුළු මොහොතකට පෙර ඊට අදාළ ගිවිසුම අවසන් කර ඇති බවයි.
මෙම ගිවිසුම මගින් ශ්‍රී ලංකාවට කැපී පෙනෙන ණය සහනයක් හිමිවන අතර අත්‍යවශ්‍ය මහජන සේවාවන් පවත්වා ගැනීමටත් සංවර්ධන අවශ්‍යතා සඳහා මූල්‍ය පහසුකම් සපයා ගැනීමටත් හැකිවන බව ජනාධිපති මාධ්‍ය අංශය වැඩිදුරටත් පවසා තිබෙනවා.
එසේම ද්වීපාර්ශ්වික ණය ප්‍රතිව්‍යුහගත කිරීම සම්බන්ධයෙන් ශ්‍රී ලංකාව සහ චීන අපනයන – ආනයන බැංකුව සමගද ගිවිසුම් අත්සන් කිරීම හෙට දිනයේ දී (27) සිදු කෙරෙන බවද මුදල් රාජ්‍ය අමාත්‍ය ශෙහාන් සේමසිංහ මහතා සඳහන් කර ඇත්තේ ඔහුගේ X ගිණුමේ සටහනක් තබමිනි.
මෙම ක්‍රියාවලියට නායකත්වය දුන් නිල ණයහිමි කමිටුවේ ( OCC) සම-සභාපතීත්වය දරන ප්‍රංශය, ඉන්දියාව සහ ජපානයට, එහි අනෙකුත් සාමාජිකයින් ට මෙන්ම චීන අපනයන – ආනයන බැංකුවට ද සිය ප්‍රණාමය හිමිවන බව රාජ්‍ය අමාත්‍යවරයා එහි සඳහන් කර තිබෙනවා.
එසේම ශ්‍රී ලංකාවේ බාහිර ණය අර්බුදයට ප්‍රතිකර්මයක් සෙවීමට කැපවූ OCC ලේකම් කාර්යාලයට සිය ස්තූතිය හිමිවන බවත් මෙමගින් ශ්‍රී ලංකාවේ ආර්ථිකය සම්බන්ධයෙන් විශ්වාසය වැඩිවන බවත් එය ආර්ථික වර්ධනයට රුකුලක් බවත් අමාත්‍යවරයා වැඩිදුරටත් සිය සටහනේ දක්වා තිබෙනවා.
