නිරූපණ ශිල්පනි පියුමි හංසමාලිට අයත් පෞද්ගලික ආයතනයේ කුරියර් සේවයේ සේවය කළ පුද්ගලයන් සිවු දෙනෙක්ගෙන් අපරාධ පරීක්ෂණ දෙපාර්තමේන්තුව ඊයේ (27 දා) ප්‍රශ්න කර ප්‍රකාශ ලබාගෙන තිබෙනවා.
ඒ මෙම කුරියර් සමාගමේ ප්‍රධානියා ඇතුළු සිවු දෙනකුගෙන් ප්‍රශ්න කර ප්‍රකාශ ලබාගැනීමට අධිකරණය අපරාධ පරීක්ෂණ දෙපාර්තමේන්තුවට පෙරේදා (26 දා) අවසර ලබා දීමත් සමඟයි.
අසීමිත ධනස්කන්ධයක් ඉපයීම සම්බන්ධයෙන් පියුමි හංසමාලිට එරෙහිව අපරාධ පරීක්ෂණ දෙපාර්තමේන්තුවේ නීති විරෝධී මූල්‍ය විමර්ශන ඒකකයට ලැබුණු පැමිණිල්ලකට අනුව මේ වන විට පරීක්ෂණයක් ආරම්භ වී තිබෙනවා.
ඒ අනුව හංසමාලිට අයත් බව කියන සම පැහැපත් කරන ආයතනයේ කුරියර් සේවය භාරව සිටි නිලධාරියා කැඳවීමට අපරාධ පරීක්ෂණ දෙපාර්තමේන්තුව කටයුතු කළා.
එහෙත් එම පුද්ගලයා අපරාධ පරීක්ෂණ දෙපාර්තමේන්තුව වෙත නොපැමිණි අතර අපරාධ පරීක්ෂණ දෙපාර්තමේන්තුව අධිකරණයෙන් ඊට අවසර ලබා ගැනීමට කටයුතු කර තිබෙනවා.
ඒ අනුව ඊයේ පෙරවරු 10.00 ට පමණ මෙම කුරියර් ආයතනයේ ප්‍රධානියා ඇතුළු සිවු දෙනකු නීති විරෝධී වත්කම් ඒකකය හමුවේ පෙනී සිටි අතර ඊයේ සවස් වනතුරුම ඔවුන්ගෙන් ප්‍රකාශ සටහන් කර ගැනීමට කටයුතු කර ඇති බව වැඩිදුරටත් වාර්තා වෙනවා.
