මුහුදේ පාවී ආ බෝතලයක තිබූ බීම වර්ගයක් පානය කිරීමෙන් හතර දෙනෙකු ජීවිතක්ෂයට පත්ව තිබෙනවා.
මෙසේ ජීවිතක්ෂට පත්ව ඇත්තේ තංගල්ල ධීවර වරායෙන් පසුගිය 06 වනදා මුහුදු ගිය ධීවරයින් පිරිසක් අතර සිටි සිව් දෙනෙක් බවයි වාර්තා වන්නේ.
මෙම පිරිස සැතපුම් 340 ක් දුරින් ධීවර කර්මාන්තයේ නිරතව සිටියදී මුහුදේ පාවෙමින් තිබූ දියර වර්ගයක් අඩංගු බෝතලයක් හමු වී තිබෙනවා.
ලීටර් 05 ක් පමණ ප්‍රමාණයෙන් යුත් එම බෝතලයේ මත්පැන් තිබෙන බවට සැකකර එය පානය කර ඇතැයි සඳහන්.
ඉන් පසුව පිරිස රෝගාතුර වී තිබෙනවා.
ඩෙවෝන් 05 ධීවර යාත්‍රාවෙන් ධීවරයන් 06 දෙනෙකු මෙසේ මුහුදු ගොස් අතර මිය ගිය අයගේ සිරුරු ගොඩබිමට ගෙන්වා ගැනීම සඳහා නාවික හමුදවේ ද සහාය ඇතිව විශේෂ වැඩපිළිවෙළක් ක්‍රියාත්මකයි.
