දෙස් විදෙස් සංචාරකයින්ගේ ආකර්ශනයට පාත්‍ර වූ දෙහිවල සත්ව උද්‍යානයේ වෙසෙන සතුන් නොසලකා හරිමින් ඔවුන්ට ඉතා පහත් ආකාරයෙන් සලකන බවට වන ඡායාරූප කිහිපයක් සමාජ මාධ්‍ය තුළ සංසරණය වෙමින් පවතී.
එම ඡායාරූපවල දැක්වෙන සතුන් ඉතාම දුක්ඛිත ආකාරයෙන් කල් ගෙවන ආකාරය දැක්වෙන අතර එම ඡායාරූප අතර කෘෂව ගිය සිංහයකුගේ ඡායාරූපයක් ද වෙනවා.
එම සිංහයා දෙහිවල සත්වෝද්‍යානයේ සිටින සිංහයකු ද හෝ වෙනත් රටකින් වාර්තා වූ ඡායාරූපයක් ද යන්න මෙතෙක් තහවුරු වී නැහැ.
කෙසේවෙතත් මෙම හුවමාරුවන ඡායාරූප සලකා බලමින් ‘දෙහිවල වධාකාගාරය වසා දැමිය යුතුයි’ හා ‘දෙහිවල සත්ව උද්‍යානය වර්ජනය කරමු’ වැනි සටන් පාඨ රැල්ලක් මේ වන විට සමාජ මාධ්‍ය ඔස්සේ නිර්මාණය වෙමින් ඇති ආකාරය දැකගත හැකියි.
බොහෝ දෙනෙක් පවසා ඇත්තේ මේ පිළිබඳ ජ්‍යාත්‍යන්තර සතුන් පිළිබඳ කටයුතු කරන ආයතනවලට දැන්වීම හැකි ඉක්මණින් සිදු කළ යුතු බවයි.
දෙහිවල සත්වෝද්‍යානයේ සිටින සතුන්ගේ ඉරණම ඔවුන් රඳවා ඇති දුක්ඛිත ආකාරය පිළිබඳ විරෝධතා හා විවේචන කාලයක සිටම පවතින්නකි.
