හිටපු සෞඛ්‍ය අමාත්‍ය කෙහෙළිය රඹුක්වැල්ල මහතාගේ ඇතුළු පවුලේ 6 දෙනෙකුගේ ස්ථාවර තැන්පතු ගිණුම් සහ ජීවිත රක්ෂණ ඔප්පු මාස 3කට අත්හිටුවීමට අධිකරණය අද (05) නියෝග කළා.
කොළඹ මහාධිකරණ විනිසුරු මංජුල තිලකරත්න මහතා විසින් අදාළ නියෝගය නිකුත් කරනු ලැබූ අතර එම ස්ථාවර තැන්පතු ගිණුම් සහ ජීවිත රක්ෂණ ඔප්පු වල වටිනාකම රුපියල් මිලියන 97 (කෝටි 9) කට අධික බව සඳහන් වෙනවා.
එම බැංකු ගිණුම් සහ ජීවිත රක්ෂණ ඔප්පු පවත්වාගෙන ගොස් ඇත්තේ කෙහෙළිය රඹුක්වැල්ල, ඔහුගේ බිරිඳ, දියණියන් තිදෙනා සහ එක් දියණියකගේ ස්වාමි පුරුෂයා නමිනි.
ඒ අනුව අදාළ වත්කම් 2024 ඔක්තෝබර් 04 වැනිදා දක්වා අත්හිටුවීමට නියෝග කළ අධිකරණය එදිනට පරීක්ෂණවල ප්‍රගතිය අධිකරණයට වාර්තා කරන ලෙස අල්ලස් හෝ දූෂණ චෝදනා විමර්ශන කොමිෂන් සභාව වෙත නියෝග කරනු ලැබුවා.
ප්‍රමිතියෙන් තොර මානව ඉන්ට්‍රාවේනස් ඉමියුනොග්ලොබියුලින් (IVIG) එන්නත මිලදී ගැනීමට සම්බන්ධ බවට චෝදනා එල්ල වූ හිටපු සෞඛ්‍ය අමාත්‍යවරයා මේ වන විට රක්ෂිත බන්ධනාගාරගතව සිටියි.
