කරන්දෙණිය සෞඛ්‍ය වෛද්‍ය නිලධාරී කාර්යාලයේ සේවය කරමින් සිටිය දී නාඳුනන වෙඩික්කරුවන් අතින් ඝාතනය වූ මහජන සෞඛ්‍ය පරීක්ෂක රොෂාන් කුමාර මහතාට ඔහුගේ නිවසේ දී වෙඩි තබා ඝාතනය කිරීම වැරදීමකින් සිදු වූවක් බවට පොලිසිය හමුවේ මේ වන විට කරුණු අනාවරණය වී තිබෙනවා.
මෙය අනාවරණය වී ඇත්තේ ඊයේ (04) ගල්කිස්ස බඩෝවිට ප්‍රදේශයේ දී එම ඝාතනය සිදු කළ බවට සැකකරන පුද්ගලයා ගල්කිස්ස මූලස්ථාන පොලිසියේ නිලධාරීන් කණ්ඩායමක් විසින් අත්අඩංගුවට ගැනීමෙන් පසු ඔහුගෙන් දිගින් දිගටම කරන ලද ප්‍රශ්ණ කිරීම්වලට අනුවයි.
මෙම පුද්ගලයාට ඩුබායි රටේ සැඟව සිටින පාතාල නායකයකු ලෙස සැලකෙන සමන් කොල්ලා නැමැත්තකු මහජන සෞඛ්‍ය පරීක්ෂකවරයාගේ නිවස පිහිටි ප්‍රදේශයේ පදිංචිව සිටින උප පොලිස් පරීක්ෂවරයකු ඝාතනය කරන ලෙසට රුපියල් ලක්ෂ 8 ක කොන්ත්‍රාතුවක් ලැබී තිබෙනවා.
එම උප පොලිස් පරීක්ෂකවරයාගේ ඡායාරූප වෙනුවට වෙඩික්කරු අතට ලැබී ඇත්තේ මහජන සෞඛ්‍ය පරීක්ෂකවරයාගේ ඡායාරූපයකි. එම ඡායාරූපයේ මහජන සෞඛ්‍ය පරීක්ෂකවරයා නිල ඇඳුමෙන් සැරසී සිටීම නිසා ඔහු පොලිස් නිලධාරියකු බව වෙඩික්කරු වැරදියට වටහාගෙන ඇති බවයි වාර්තා වන්නේ.
ඩුබායි රටේ සැඟවී සිටින සමන් කොල්ලා නමැති පාතාල නායකයා එම කොන්ත්‍රාත්තුව ලබා දී ඇත්තේ ඝාතනය කරන පුද්ගලයා විශ්‍රාමික පොලිස් නිලධාරියකු බව පවසමිනි.
නමුත් පොලිසිය පවසන්නේ ඔහු දැනටමත් රාජකාරියෙ හි නියුතු උප පොලිස් පරීක්ෂකවරයකු බවයි.
එම උප පොලිස් පරීක්ෂක ඩුබායි හි සිටින සමන් කොල්ලා නැමැති පාතාලකරුගේ හෙරොයින් තොගයක් අත්අඩංගුවට ගැනීම නිසා මෙම ඝාතනය සිදු කිරීමට සැලසුම් කර ඇති බවයි පොලිසිය පවසන්නේ.
