පොලිස්පතිවරයා ආරක්ෂක අමාත්‍යාංශයට නිල ඇඳුම ගලවා සිවිල් ඇඳුමෙන් පැමිණ තවමත් එහි කටයුතුවලට බලපෑම් කරන බව විපක්ෂ නායක සජිත් ප්‍රේමදාස මහතා අද (26) පාර්ලිමේන්තුවේ දී සඳහන් කළා.
එහි දී රජය පාර්ශවය අදහස් දක්වමින් එය ප්‍රතික්ෂේප කරන බවත් නිල ඇඳුමින් හෝ එසේ නොමැතිව ආරක්ෂක අමාත්‍යාංශය වෙත පැමිණ නැති බව සඳහන් කළා.
එහි දී සජිත් ප්‍රේමදාස මහතා පැවසුවේ එසේ නම් පොලිස්පතිවරයා වස්ත්‍රයක් නොමැතිව හෝ එහි පැමිණ ඇති බවයි.
“එහෙනම් වස්ත්‍රයක් නැතුව ආවද දන්නෙ නෑ. අගමැතිතුමා ලැජ්ජයි. මමත් රාජකීයේ. එතුමත් රාජකීයේ. රාජකීයේ ළමයි ඇවිත් ගැලරියේ බලන් ඉන්නවා. ශ්‍රේෂ්ඨාධිකරණ තීන්දුව වලංගු නෑලු. ආණ්ඩුක්‍රම ව්‍යවස්ථාව උල්ලංඝනය කිරීමට අප කිසිවකුට අයිතියක් නෑ. අද රාජකීයෝ දෙන්නෙක් එකතු වෙලා ශ්‍රේෂ්ඨාධිකරණ තීන්දුවක් උල්ලංඝ්නය කිරීමට කටයුතු කළා.”
පොලිස්පතිවරයාගේ රාජකාරි අත් හිටුවමින් ශ්‍රේෂ්ඨාධිකරණය ලබා දුන් තීන්දුව විවේචනය කරමින් අගමැති දිනේෂ් ගුණවර්ධන මහතා අද (26)පාර්ලිමේන්තුවේ විශේෂ ප්‍රකාශයක් සිදු කර අතර විපක්ෂ නායක සජිත් ප්‍රේමදාස මහතා ඇතුළු විපක්ෂ කණ්ඩායම් ඊට එරෙහිව අදහස් දැක්වුවා.
