ජනාධිපති රනිල් වික්‍රමසිංහ මහතා උම්මන්තක ආකාරයෙන් අධිකරණය සමඟ ගැටුමක් නිර්මාණය කරමින් පවතින බව ජාතික ජන බලවේගයේ නායක අනුර කුමාර දිසානායක මහතා පවසනවා.
ජන වරමක් ලබා නොගෙන හොර පාරවලින් සිය බලය තහවුරු කර ගැනීම සඳහා බොහෝ ක්‍රියාමාර්ග ගැනීමෙන් පසු හා අවසන එම සියල්ල අධිකරණය මඟින් ව්‍යර්ථ කිරීමෙන් පසු ඔහු උම්මන්තක ලෙස හැසිරෙන බවයි ඔහු පෙන්වා දුන්නේ.
ඔහු මේ බව පැවසුවේ ජාතික ජන බලවේගයේ මැතිවරණ නිරීක්ෂණ මධ්‍යස්ථානය විවෘත කිරීමේ අවස්ථාවට සහභාගී වෙමින්.
තමාට සිතැඟි ආකාරයට පාර්ලිමේන්තුව මෙහෙයවීමටත් තමාට සිතැඟි ආකාරයට අධිකරණය මෙහෙයවීමටත් උම්මන්තක ආශාවකින් පෙළෙන බව ඔහු සඳහන් කළා.
වැඩිදුරටත් ඔහු මෙසේ පවසා සිටියා.
“දේශබන්දු තෙන්නකෝන්ගේ නඩුව ඉතා පැහැදිලියි ශ්‍රේෂ්ඨාධිකරණය විභාගයට ගනු ලැබුවේ ඔහුගේ පත්වීම නීත්‍යානුකූල ද කියන කාරණය. යම් පත්වීමකින් තමන්ගේ මූලික අයිතිවාසිකම් කඩ වීමක් සිදු වේයැයි පුරවැසියකු සිතනවා නම් ඔවුන්ට ඕනෑම අවස්ථාවක ශ්‍රේෂ්ඨාධිකරණය ඉදිරියේ මූලික අයිතිවාසිකම් නඩුවක් ගොනු කළ හැකියි. ඒ අනුව තමයි දේශබන්දුගේ පත්වීමට විරුද්ධව ශ්‍රේෂ්ඨාධිකරණය ඉදිරියේ මූලික අයිතිවාසිකම් නඩුවක් ගොනු කරනු ලැබුවේ. මැතිවරණයක් ආසන්නයේ නැවත සමාජය තුළ ව්‍යාකූලත්වයක් නිර්මාණය කර ගැනීම සඳහා පොලිස්පතිවරයාගේ පත්වීම මඟ අරමින් ඉන්නවා. දිනේෂ් ගුණවර්ධන අගමැතිවරයා පාර්ලිමේන්තුවේ මේ සම්බන්ධයෙන් දීර්ඝ ප්‍රකාශයක් කළා. අපි කියනවා ඒ කිව්ව කතා පුළුවන් නම් එළියේ කියන්න. ඒ වගේම අපි දේශබන්දුට කියනවා එක ටෙලිෆෝන් පණිවිඩේකට චක්‍රලේඛයකට පොලිස් දෙපාර්තමේන්තුව ලබා දෙන නිවේදනයකට එක අත්සනක් ගහන්න.”
