රට තුළ පවතින ප්‍රශ්ණ විසඳීමට එක් ආණ්ඩුවක් ප්‍රමාණවත් නොවන බවත් ආණ්ඩු දහයක් නිර්මාණය කිරීම සිය අරමුණ බව ජනපති රනිල් වික්‍රමසිංහ මහතා සඳහන් කළා.
“පළාත් ආණ්ඩු නවයයි. මධ්‍යම ආණ්ඩුවයි. ඔක්කොටම වැඩ තියෙනවා. අපි ඉදිරියට යං”
අද (31) ශ්‍රී ලංකා පොදු ජන පෙරමුණේ සහ එක්සත් ජාතික පක්ෂය නියෝජනය කරන පළාත් සභා නියෝජිතයන් පිරිසක් හමුවූ අවස්ථාවේ ඔහු මේ බව කියා සිටියා.
පොහොට්ටුවේ සහාය නොලැබෙන්න තමාට මේ රට මේ තත්‍ත්වයට ගෙන ඒමට නොහැකි බවත් එම තීරණය ගත් මහින්ද රාජපක්ෂ මහතාට ස්තූතිවන්ත වන බව ද ඔහු සඳහන් කළා.
“අපි ඔක්කොම මුණ ගැහුණේ 2022 ජුලි මාසේ. අපි ඔක්කොම නිවාස නැති නිවාස හිමියන්ගේ සංගමයට අයිති වුණා. එදා රටට අනාගතයක් නෑ කියලා මිනිස්සු කිව්වා. රටට ඉදිරියට යන්න බැරි වෙයි කියල හිතුවා. ඇයි මේ ආණ්ඩුව ගත්තෙ කියලත් සමහරු ඇහුවා. මං කිව්ව මට විශ්වාසයක් තියෙනව රට ගොඩගන්න පුළුවන් කියලා. පොහොට්ටුවේ අය එක්ක පුළුවන් ද කියලා සමහරු ඇහුවා. මං කිව්ව තියෙන අය එක්ක වැඩ කරනව මිස මට දිව්‍ය ලෝකෙ මවන්න බෑනේ. අපි ගමන යමු කියලා. ඒ අය කියනවා අද ඔයාට හොඳ කණ්ඩායමක් ඉන්නවනේ කියලා”
අද උදෑසන ටෙහෙරානයේ දී හමාස් නායකයා මරා දැමූ බවත් එම ක්‍රියාව හෙළා දකින බවත් ජනාධිපතිවරයා මෙහි දී කියා සිටියා.
