නාමල් රාජපක්ෂ සහ සජිත් ප්‍රේමදාස මහතා කොළඹ තැන් කිහිපයක දී නිතර නිතර මුණ ගැසී ඇති බවට වාර්තා පළ වෙමින් පවතින බවත් සජිත් ප්‍රේමදාස මහතා මෙම වාර්තාවල ඇත්ත නැත්ත පිළිබඳව වහාම රටට කරුණු හෙළි කළ යුතු බවත් ජනාධිපති ජ්‍යෙෂ්ඨ උපදේශක ආශු මාරසිංහ මහතා සඳහන් කළා.
ඒ මහතා මේ බව පැවසුවේ සිරිකොත පක්ෂ මූලස්ථානයේ ඊයේ (01) පැවැති මාධ්‍ය හමුවට එක් වෙමිනි.
“අපි දකිනවා පුතාණෝලා දෙන්නෙක් සාකච්ඡා ආරම්භ කර තිබෙනවා කියලා.පුවත්පත් කාටුනයකින් සජිත් ප්‍රේමදාස සහ නාමල් රාජපක්ෂ මහත්වරුන් කතා කරනවා ඇඳලත් තිබ්බා.මම මේ නිසාම පාර්ලිමේන්තුවේ හැන්සාඩ් වාර්තා අරගෙන පුංචි සමීක්ෂණයක් කර බැලුවා සජිත් ප්‍රේමදාස මහතා දැන් යම්කිසි කාලයක සිට රාජපක්ෂ හොර කල්ලිය කියන වචනය පාවිච්චි කරන්නේ නැහැ.
මේ නායකයෝ දෙන්නා කොළඹ ප්‍රදේශයේ තැන් කීපයකදී නිතර හමුවෙලා තිබෙනවයි කියා අපේ මන්ත්‍රීවරු කීපදෙනෙකුත් අපට කනින් කොනින් ආරංචි කිව්වා. ඒ වගේම නාමල් රාජපක්ෂ වෙනම පොහොට්ටුව අපේක්ෂකයෙක් දාන්න සූදානම් වෙනවා කියන දා ඉඳන්ම නැවත රනිල් රාජපක්ෂ කියන නාමය නැවත පාවිච්චි කරන්න හැකියාවක් නැහැයි කියන කාරණය ඉතා පැහැදිලිව පේනවා. අපි දැක්කා ඒ කාලේ තිබුණා රනිල් වැල් පාලමෙන් එතෙර කරන්න හදන්නේ නාමල් රාජපක්ෂ ද කියලා කියනවා. දැන් ඒ කාරණය ප්‍රතික්ෂේප වී තිබෙනවා.”යැයි ආශු මාරසිංහ කියා සිටියා.
ශ්‍රී ලංකා පොදුජන පෙරමුණ විසින් වෙනම අපේක්ෂකයෙක් ඉදිරිපත් කිරීමට සූදානම්යැයි පැවසූ දා සිට රනිල් රාජපක්ෂ යන නාමය නැවත භාවිත කිරීමට හැකියාවක් නැති බව ද ඔහු පැවසුවා.
ඉදිරි දිනවලදී සංවේදී පුවත් ලැබෙනු ඇති අතර වත්මන් ජනාධිපති රනිල් වික්‍රමසිංහ මහතා මේ වන විට විපක්ෂයේ මන්ත්‍රීවරුන් කිහිප දෙනෙකු සහ පක්ෂ නායකයින් සමඟ සාකච්ඡා කරමින් සිටින බවයි ඔහු කියා සිටියේ.
ඉදිරි දිනවලදී විශේෂ ප්‍රවෘත්ති කිහිපයක් බලාපොරොත්තු වන ලෙස ද ඔහු ඉල්ලා සිටියා.
බදාදා සජබ මන්ත්‍රීනී තලතා අතුකෝරළ මහත්මිය වෝටර්ස් එජ් එකෙන් එළියට එන විට මාධ්‍යවේදීන්ගේ අතටම අහු වුණු ආකාරයේ නාට්‍ය ද ඉදිරියේ දී බලාගත හැකි වනු ඇතැයි ඔහු වැඩි දුරටත් සඳහන් කළා.
