පාතාල කල්ලි නායක ලොකු පැටී මාසයක කාලයක් බන්ධනාගාරගත කිරීමට බෙලරූස් අධිකරණය නියෝග කර තිබෙනවා.
බෙලරූස් රාජ්‍යයේ ගුවන් තොටුපළක දී එරට පොලිසිය මගින් අත්අඩංගුවට ගත් ලොකු පැටී අධිකරණය ලබාදුන් එම නියෝගයෙන් පසු විශේෂ ආරක්ෂාවක් යටතේ බන්ධනාගාරගත කිරීමටයි කටයුතු කර ඇත්තේ.
ශ්රී ලංකා පොලීසිය මේ වන විට ඔහු මෙරටට ගෙන ඒම සඳහා අවශ්‍ය ක්‍රියාමාර්ග ගනිමින් සිටින බව ජ්‍යෙෂ්ඨ පොලිස් නිලධාරියකු පවසා තිබෙනවා.
මෙම පාතාල නායකයා මාසයක කාලයක් බෙලරූස් බන්ධනාගාරයේ රඳවා තැබීමෙන් පසු මෙරටට ගෙන ඒම සඳහා කටයුතු කරන බවද එම උසස් නිලධාරියා වැඩිදුරටත් කියා සිටියා.
මේ අතර බෙලරූස් රාජ්‍යයේම වෙනත් ස්ථානයක දී අත්අඩංගුවට ගත් බව කියන පාතාල නායක කංජිපානි ඉම්රාන්, රොටුඹේ අමිල නමැති පුද්ගලයන් සහ පාතාලය සම්බන්ධව තවත් දෙදෙනකුගෙන් එරට විශේෂ පොලිස් කණ්ඩායමක් ප්‍රශ්න කරගෙන යන බව ද සඳහන්.
පොලිස් ආරංචි මාර්ග පවසන ආකාරයට මෙම අපරාධකරුවන්ද මෙරටට ගෙන ඒම සඳහා අවශ්‍ය කටයුතු සම්පාදනය කරමින් පවතී.
මෙම පාතාල නායකයන්ට එරෙහිව ශ්රී ලංකා පොලිසිය ජාත්‍යන්තර පොලිසිය හමුවේ කර තිබූ පැමිණිලිවලට අනුව ඔවුන් මෙසේ අත්අඩංගුවට ගෙන තිබූ බව ද ආරංචි මාර්ග කියා සිටියා.
