ශ්රී ලංකා ක්‍රිකට් ආයතනය හෝ ක්‍රීඩකයින්ට පමණක් බදු සහන දී දී ඇති බවට වාර්තා පළවීමත් සමඟ එවැන්නක් සිදුව ඇත්නම් ඒ පිළිබඳව දේශීය ආදායම් දෙපාර්තමේන්තුවේ කොමසාරිස් ජනරාල්වරයා සිය ස්ථාවරය වහාම රටට පැහැදිළි කළ යුතු බව රජයේ වෛද්‍ය නිලධාරීන්ගේ සංගමය පවසා තිබේ.
ඒ සංගමය මේ බව පවසා ඇත්තේ ශ්රී ලංකා ක්‍රිකට් ආයතනය හා ක්‍රිකට් ක්‍රීඩකයන්ගේ ආදායම සම්පූර්ණයෙන් බදුවලින් නිදහස් කර ඇති බව කියමින් ක්‍රීඩා ඇමැති රොෂාන් රණසිංහ මහතාගේ අත්සනින් යුත් ලිපියක් සමාජ මාධ්‍යයේ සැරිසැරීම හේතුවෙනි.
එහි අන්තර්ගතය පිළිබඳව කඩිනමින් පැහැදිලි කරන ලෙස ඉල්ලමින් එම සංගමය දේශීය ආදායම් දෙපාර්තමේන්තුවේ කොමසාරිස් ජනරාල්වරයා වෙත ලිපියක් යොමුකර ඇත.
එම සංගමයේ ලේකම් වෛද්‍ය හරිත අලුත්ගේ මහතා පවසන්නේ සමාජ මාධ්‍යයේ හුවමාරු වූ ලිපියේ අන්තර්ගතයට අනුව ශ්රී ලංකා ක්‍රිකට් ආයතනයේ සහ ක්‍රිකට් ක්‍රීඩකයින්ගේ ආදායම බදුවලින් සම්පූර්ණයෙන්ම නිදහස් කර ඇති බවට සඳහන්ව තිබීම විමතියට හේතුවූ බවයි.
දේශීය ආදායම් දෙපාර්තමේන්තුවේ කොමසාරිස් ජනරාල්වරයා ඇතුළු බලධාරීන්ගේ ස්ථාවරය වූ කිසිදු පාර්ශ්වයකට හෝ කණ්ඩායමකට විශේෂිත බදු සහන ලබා නොදීමේ තීරණය මෙමගින් උල්ලංඝනය වී ඇතැයි ඔහු පවසා තිබේ.
